Cibraan 6 - Saaho Cusub Cahde

¹ Amaydo, tamaa erhedhdhot Masiix mazhabko, gufaynolle tillabnowaanta kibah, tamaa rabi xiyaa gudduusa abittot kee Yallah yaaminiinimhi zacabah malammih toobat masarrat sigishaanamalle gaxe waynowaanta.

² Aythammaq, gabub xiyaalle hayaanam, rabaako uguttem kee umman geedit firdehi darseeko akko tillabno nolle tane.

³ Yalli farhemko tayim abno kino.

⁴ Tamaa wuli gedda ifo geyenyaako carshi muttuxuwaako dhacameenih, Quddus kin Ufaye yengele mari,

⁵ Yallih waanittahi mecaani kee yamiite waqhtehi xaylaako dhacame mari,

⁶ Yallaako mirix-yerhxiinimko, Yallih Barha gaxeenih sinneh masqalak takareenih xiyaw nifille kaa xoolayshak yaniinim balih kibah toobah gaxoona takkem maki.

⁷ Tamaa alle rada rob taacube baarho, tamaa akah timzirriye marah yamfice ilaw bahta gedda, Yallaako baraka geyta.

⁸ Keenan kee sibsib bahtemko laakin, amficinnixe abaaro-le takke, tee abayshima lel xarar kinni.

⁹ Taginah waanishno kibah, yi kaxantoolito, sinim yekkemko, tashshem kee gargertim kinamah imaan geyneh nane.

¹⁰ Yalli xaqqi-wanna akkinnixe tiya makinamhi sabbatah, kaa migacah arhxitin kaddih akah abak taniiniikah, tamaa yinqiddise marahi khidmadde tuybulluwin sin ciyyo kee kaxano biyashshimtam maki.

¹¹ Ni naba duumi lel sinko ummanti tamaa cagah litiinim inkoh sinah takko ciloh, abayshima fanah amaa gina-le ayqari taybulluynim kinni.

¹² Amayim lel, atin tamaa imaan kee sabreh tamaa wacde yiwrishe marah tammangadoona kinni farhnam kibah, bohosa takkoona mifarhna.

Yallih wacdi thummut kinam

¹³ Yalli Abraahimih wacde akah saye gedda, isheeko naba tiya akah dhiiwitaya luuk miyinemhi sabbatah, isheh kinni dhiiwitem.

¹⁴ Tahe lel yerhxe: “Rummah kodde ebeerekeh ku aymango kiyo.”

¹⁵ Abraahim lel, sabreelih ilaaleyaako amaa wacde geye.

¹⁶ Xiyaw sinneeko nabamah kinni dhiiwitaanam, umbuka sinni zagaxax abayshimalle akah bakaanam lel amaa dhiiwa kinni.

¹⁷ Amaymih kinni lel Yalli kaa xagarahi xibar anqiyyirinnixe tiya kinam tamaa wacde yawrishe mara sikifta hinnim yayballaw farhe gedda, dhiiwah kinni akah yuythummutem.

¹⁸ Amaydo, tamaa anqiyyirinnixe lamma xaaja, Yalli zirabbito akah akkinnixeyadde, nanu tamaa cuqhbah alle kudeh yane marak, ni nifidde yane cagalle akah nasbiteekah dhacuma aydukumusnan geyno ciloh kinni.

¹⁹ Nanu lel ta thummut kee tisbite rooxi borosho kin cag, goleenaako tillaabah addak addadde orobaya lino.

²⁰ Yeesus lel Malkitsedeq balih umman geedit naba shekh yekkeyaako, ni basolle ni idhdhadde amadde orobeh yane.