Cibraan 5 - Saaho Cusub Cahde

¹ Naba shekh akkinnanti xiyawko doorimah kinni, xiyaw idhdhadde Yallah muttuxuwa yaxaw kee zambeh sadaqha abo ciyyo akah tamxayem.

² Usuk isheh rukut tiya kinamhi sabbatah, tamaa sorheenit kee yiqhlithe maralle alle raxmatanta.

³ Amayimhi sabbatah lel, tamaa xiyawah akah abaakah, ishi idhdhadde gantah zambi sadaqha abo kaalle tane.

⁴ Tamaa Haaruun balih Yalli akah deecime tiyaako bextih, isheh ta xishmat makaano yabbarho dhiicati miyane.

⁵ Amaydo, Masiix gantah isheh naba shekh yekkeh maynabinnaaki: “Atu yi Barha kito, kaafa ku baaheh aniyo” terhxeh akko abtem kayya kinni.

⁶ Akuula lel: “Malkitsedeq balih lel atu umman geedit shekh kito” akko yerhxe.

⁷ Yeesus tamaa xazotta kuuk yine gedda, rabaako kaa gargeero dhiice tiyalle, naba zeero kee dhiimoolih dhaaco kee dhaacimto kab-ishak yine. Amnonobba hin kaa am-azzazti sabbatah lel Yalli kaa yoobbe.

⁸ Usuk barha kuuk yine hanuk, tamaa waaxelsiitemhi araxah yam-izziziinim labcaade.

⁹ Naqhuse hin tiya yekkeh lel tamaa inkoh kaa yaabbe marah umman geedit garger-hi raxeena akah yekke.

¹⁰ Yalli lel tamaa Malkitsedeq balih kin naba shekh akko abe.

Imaanadde carsimaanam

¹¹ Tayimhi zacabah narhxe mangum lino, yakko kibah sin cokkak maabbooko yidinzizeh yanemhi sabbatah caddos sinah abaanam siriya.

¹² Kado fanah mudarrisiin takkoona sinah eedak tine haaki, tamaa masarrat kin Yallih waanitta malammih sin yayduruseti sin farhshiishak yane. Sin farhshishsham xan kibah, kafin folo maki,

¹³ amayim lel akkinnanti xanah maraya zabalo kinamhi sabbatah xaqqi waanittahi zacabah labcaadotta kinni.

¹⁴ Laakin kafin folo naba marah kinni, amayim lel tamaa umaani kee mecaani sittiyaako akah barhishaanaakah sinneh sinne labcaadisheenih dhic le mara kinoonimhi sabbatah kinni.