Cibraan 4 - Saaho Cusub Cahde

¹ Amaydo, kaa macrafadde orobaanamhi wacdi anuk, sinko walaa inketti amakke gufekkah raacamko mashshinnoo.

² Mece wari tenalle akah warroyekah kinni nolle warroyem, laakin tamaa yoobbe maraalih imaanah tiya kuuk miyiniinimhi sabbatah, tamaa yoobbin farto ten mamfacinna.

³ Yalli: “Tamaa inni kuradde akah dhiiwiteekah, yi macrafadde caduruh oroboona makinooni” akah yerhxeh yaneekah, tamaa yeemene marak notta kinni amaa macrafadde orobto lem. Yakko kibah kaa ciyyo tamaa caalam dhishshimte maxko abayshimte hanuk kinni.

⁴ Tamaa malxin-ya maxhi zacabah wulidde: “Yalli umbuka ishi ciyyooko malxin-ya max yucrufe” yerhxeh taginah waanisheh yane.

⁵ Malammih lel ta faqharadde: “Usun yi macrafadde caduruh oroboona makinooni” yerhxeh yane.

⁶ Amaydo, ta macrafadde oroba mari yinniinik sarrah, tamaa afadde mece ware kabbaate mari lel yaabboona xineenimhi sabbatah orobe wayenik sarrah,

⁷ Yalli malammih wuli lellec yixiggireyaako “Kaafa” yerhxeh dherh waqhtek sarrah Dawud araxah tamaa awwalko xussumte waanih: “Kaafa kaa dhaw toobbiinimko, sinni afcaado maytararina” yerhxeh yine.

⁸ Yehooshuca ten yuscurefeh yakkeedo, sarrah aki lellec hi zacabah Yalli waanisheh anniye mirhaarho.

⁹ Amaymih, aki Sambat Yallih xiyawah curfen max yakkeya yane.

¹⁰ Yallih macrafadde orobeh anniinnanti lel tamaa Yalli akah abeekah ciyyooko yucrufeh yane.

¹¹ Amaydo, walaa inketti tamaa yaabbo xine marahi misaal katayeh radamko, ta macrafadde akah orobnaakah xawalnoo.

¹² Yallih waanitta tane tiya kee makko le tiyä kinni; rooxe kee ufaye, mayrhabbashit kee dhux barhishshah curmusa lamma af-le sefko lel lilliga. Afcaadodde yane xisaab kee farhi lel tamirmire.

¹³ Kaa intille lel ummanim casno kee tambulluwem kibah, kaako sucuta makhluuqhti miyane, inkoh lel kayyah kinni esserimnam.

Yeesus nabamko naba shekh

¹⁴ Amaydo, carshelle kore nabamko naba shekh kin Yeesus, Yallih Barha linomhi sabbatah, ninni shahaadalle qath-narhxoo.

¹⁵ Ni rukta yubleh nolle yassaxakko waya shekh maki linomki, notta balih ummanimih cakana alle tekke hanuk, zambe abe waye tiya kinni.

¹⁶ Amaydo, xati adde ni farhshiisha waqhtedde, raxma kabbatno kee nicma geyno ciloh, fidbeelih tamaa nicma-le nugus-kurselle kab-narhxoo.