Cibraan 3 - Saaho Cusub Cahde

Yeesus Moosaako naba

¹ Amaydo, tamaa carsheeko deeco yangale yinqiddise yi saculo, nanu fartotta kee naba shekh kinamah akah naamine Yeesus meceetih ubula.

² Tamaa Moosa umbuka Yallih caredde umun akah kuuk yineekah, Yeesus tamaa kaa ciyyo abo kaa dhirhiye Yallah umun kuuk yine.

³ Tamaa careeko isheh amaa care siraaxeti mango xishma akah leyaaka balih, Yeesus Moosat nabneeko naba nabne akah eedda.

⁴ Amayim lel umman care siraaxati xiyawto kinni, ummannim siraxtam laakin Yalla kinamhi sabbatah kinni.

⁵ Moosa lel tamaa sarrah adde waanishoona loonimih shaahid yakko ciloh, umbuka Yallih caredde umun kin khaddaam kuuk yine.

⁶ Masiix laakin barha balih Yallih carehi bukalle umun kinni. Tamaa ninni fidbe kee ninni faloolih, ninni cagalle qath-nerhxemko, nanu kaa care kino.

Macrafa Yallih xiyawah

⁷ Amaydo, Quddus kin Ufayi taginah yarhxe: “Kaafa kaa dhaw toobbiinimko,

⁸ tamaa cakanat lellec zibolle kaa diddeh akah ugutteeniikah sinni afcaado maytararina.

⁹ Amalle sin abbub cakanadde yi saysheenih marootom iggidiya lel yi abittot yublin.

¹⁰ Amaymih, tamaa ijolle alle kurrayeyaako: ‘Usun umman gedda sinni afcaadooko mirix yok yarhxin; yi arux yeerhegiinih miyaniini.’

¹¹ Inni kuradde dhiiwiteh lel: ‘Yi macrafadde caduruh oroboona makinooni.’”

¹² Yi saculo, sinadde umati aamininnixe afcaado leyaya, tamaa yane Yallaako mirix sin ishaya yanniyek, selitanta.

¹³ “Kaafa” yarhxiinih akah deeciman lellec yanem fanah, zambi doolabah sinko walaa inketti afcaado tatrirek, maaxi yamaato sittiya aydumusanta.

¹⁴ Tamaa erhedhdhot ninni imaan abayshima fanah qath-ishnemko, Masiixlih nengeleh nane.

¹⁵ Tayim lel tamaa: “Kaafa kaa dhaw toobbiinimko, tamaa tam-azzazoona adde xinten max balih sinni afcaado maytararina” akah yerhxeekah kinni.

¹⁶ Tamaa yoobbin hanuk yam-azzazo xine mari miya kuuk yiniini? Inkoh tamaa Moosa Masriiko santisheh yeyyeece mara makini kinoonim?

¹⁷ Usuk marootom iggidiya aalih kurraye mara makini kinoonim? Tamaa zambe abeenih jinaaza zibolle akko racte mara makini kinoonim?

¹⁸ Kaa macrafadde sayaanamko alle dhiiwiteh, kaa yaabbo xine mara makini kinoonim?

¹⁹ Amaydo, usun tamaa sinni imaan waytohi sabbatah oroboona mirhiicinnoonim abluk nane.