Cibraan 13 - Saaho Cusub Cahde

Yalli kixin sadaqha

¹ Sacoolinni kaxani yannawoo.

² Gerha kabbaataanam mibiyashshiitina, amayim lel amaa ginah sorhak malaykut gerha balih kabbaate mari yaniinimhi sabbatah kinni.

³ Tamaa xabshedde yane mara, atin sinneh tenlih xabshedde yane mara balih, tamaa bixna yable mara lel tenlih bixna yable mara balih ten xunsusa.

⁴ Waasibo ummanille xishma geytoo, Yalli uma-xibarlit kee yazniye mara yafrado kinamhi sabbatah, waasibot carat xalaaleh yandhabbarhoo.

⁵ “Caduruh ku mixaba, ku mathlime” yerhxeh yanemhi sabbatah, sinni aniina solaadit kaxanooko dhawudhdheenih, litiinimih xedeneenit tika.

⁶ Amaydo, fidbeelih lel tahe narhxo dhicna: “Maddari yi xateena kinni; Anu mashshiito makiyo; xiyawti ayim yok abo dhiica?”

⁷ Tamaa Yallih waanitta sinlih waanishshe sin manabottit xunsusa. Ten gerh-gerhhi mawco tubliinih, ten imaan katattaanta.

⁸ Yeesus Masiix kumal, kaafa kee umman gedih lem kinni.

⁹ Mango cayna kin amidhdhiginnixe darseh midoolabimina. Sin afcaado Yallih nicmah kinni tatraro missilam kibah, sadaqhat foloh maki. Amayim lel tamaa aba mara mamfacinnamhi sabbatah kinni.

¹⁰ Nanu tamaa Yallahi reedodde yacbude mari amakkeeko beetoona xaqqe akko aallinnixon mazbax lino.

¹¹ Amaa shekh manabotti tamaa zambi sadaqhah baahan sacahi biilo yabbirheh ummanimko quddus kin makaanodde orobah, amaa xazo amaa sifraako irolle xararishak yine.

¹² Yeesus gantah xiyaw ishi biiloh yayqaddaso ciloh, amaa daafot carafko irolle bixna yuble.

¹³ Amaydo, nanu gantah usuk kabbaate waato curneyaako, amaa sifraako irolle nadawo.

¹⁴ Nanu talle umman gedih marta daafo malinooki, tamaa tamaato le tiyä wagiyak nane.

¹⁵ Amaydo, Yallah Yeesus araxah xamdet sadaqha dhuguuguluh akah bahnoo, amayim lel kaa migac cawwatoyshita ni wagubhi fire kinni.

¹⁶ Mecaani abaanam kee litiinim garoolih xazitaanam mibaddaahishina, amaa gina-le sadaqhaq lel Yalla xedenishsham kinamhi sabbatah kinni.

¹⁷ Sin manabottit sinak yarhxiinim toobbiinih, akah im-izzizanta, amayim lel usun tamaa tekkemhi addoodim yaxaw le mara balih, sin rooxe dhawrhaanamhi sabbatah kinni. Usun tayim angoroozomuk abaanam, sina tamficem makinamhi sabbatah, usun xedenak akah abaanaakah abanta.

¹⁸ Nanu cado qalbe linomuh thummut kinomhi sabbatah, ummanim meceetih abno lel farhi linomhi sabbatah, dhaaco noh abanta.

¹⁹ Anu dheh sinalle gaxo ciloh, dhaaco yoh abtoona mangum sin dhaacimak aniyo.

^20-21 Tamaa salaam Yalli, umman geedit cahdehi biiloh, ciidot naba loyna kin ni Maddara Yeesus rabaako uguseya, Yeesus Masiix araxah kayyadde basak-arhxinnannim nottadde abak, atin kaa farhi abtoona ciloh, umbuka mecaanih sin yaskataw. Umman gedda kee umman gedih lel nabne kayyah takkoo. Amin.

Abayshimat salaamta

²² Yi saculo, ta uyshudhdhurheh sinalle aktubiyuk ane fawti farto, sabreelih kabbattoona sin dhaacimak aniyo.

²³ Timoteyos ni sacal yimfittixeh yanem irhiga, usuk dheh yemeetemko lel inkidde nekkeh sin nablo kino.

²⁴ Inkoh sin manabottit kee yinqiddise marak salaam akko erhexa. Tamaa Ithaaliyaako yemeete mari lel salaamat sinak yarhxin.

²⁵ Nicma umman sinlih takkoo!