Cibraan 12 - Saaho Cusub Cahde

Ni imaan dhisheena kee abaysheeni Yeesus kinni

¹ Amaydo, nanu gantah tayidhdha takke shohodah darur balih makarimneh nanemhi sabbatah, inkoh tamaa nolle cilisham kee ni yabbirhe zambe mirix-ishnoo. Tamaa ni nifidde yane ammakaakamah lel curtayyoolih nardoo.

² Ni imaanhi dhisheena kee abaysheena kin Yeesusudde kulux-narhxoo. Usuk xooladde macalah rabekkah, tamaa nifidde akko yine xedenih arhxuk masqalak rabaanam cure. Nugus kuselle lel Yallahi mizgaako defeyeh yane.

Niya micidina

³ Tantaanamko hido niya ciddaanamko ciloh, tamaa zambi-wannunhi nacabo cure tiya macalsita.

⁴ Zambeelih andufulitin, sinni biilo adde xadhdhaanamhi daraja kaddih gufteenih mitaniini.

⁵ Tamaa dhaylo balih taginah sinah aben asuuso biyashshitteeniho? “Ko yi barhaw, Maddari digaala miilaacin, ku yiqhtsicemko lel niya micidin.

⁶ Amayim lel, Maddari digaalam kixin mara kinni, barhah kabbaatinnan tiya lel yaskoolofe.”

⁷ Yalli ishi dhaylo balih kinni sin yablemki, kaa digaala curtoona sinalle tane. Abba digaalinnixe barhah miyatti yane?

⁸ Tamaa umbuka dhaylo balih, adabe abbirhe wayteenimko laakin, xaraami dhaylo kitiininkah, xalaali dhaylo makitiini.

⁹ Tayimhi osah lel, tamaa ni dhalte abbub adabe ni yayrhibirhin, nanu lel ten xishmatna. Nanu amayimko ziyaadah tamaa ufayitti Abbah ningizziyeyaako marno nolle mitane?

¹⁰ Tamaa tenadde teshsheh akah tumbulluweekah dago geddah ni digaalen usuk laakin kaa anqaddas aalih nangalo ciloh, ni mecaanih kinni ni digaalem.

¹¹ Xiyaa digaalaanam inkoh dago geddah waaxelishshankah mixedenishsha, sarrah laakin amayim labcaade marah salaam le xaqqi daro akah bahta.

¹² Amaydo, taane sinni gabub kee qathqath-tarhxe sinni guluuba izgiriranta,

¹³ tamaa xankish uro kibah meceetih mulute wayo ciloh, sinni iboobih rig-yarhxe arux akah abanta.

¹⁴ Anqaddas hinnim Maddara yablo dhiica tiyah walaa inketti miyanemhi sabbatah, umman tiyaalih salaamadde akah martaanaakah xawalanta.

¹⁵ Yallih nicmaako walaa inketti raacak, cuuret rimid yubquleyaako sin waqhaaqhacishak, mango mara lel yaynijisek selitanta.

¹⁶ Walaa inki uma-xibarli, hido lel tamaa inki gedda beeto ciloh ishi riishinnat xaqqe yeebexe Ceesaw balih, Yallih mashshi hinti sinadde yanniyek selitanta.

¹⁷ Usuk amaa barakä sarrah yawrasho farhe hanuk, akah mamxayinna, weecak wagiye hanuk, toobah yakke caashir migeyinnam taarhigin.

Tisbite nigsinna

¹⁸ Atin tamaa gabah dhaggitta kooma, bololta gira, dat dummaahe dhacuma xaaxattalle maamaatitiini.

¹⁹ Amayim balih, tamaa yoobbe mari amaa geddaako sarrah ta gina le waanisha dhaw yaabbiinimko adde dhaacimen thurumbat dhaw alle yekkelle maamaatitiini.

²⁰ Amayim lel: “Alluulatti amaa kooma dhagemko gantah, dhayitih igdifanta” yarhxe amre curoona mirhiicinnoonimhi sabbatah kinni.

²¹ Rummah lel amaa mablo mangum xiyaa mashshishsha tiyä kuuk tineyaako, Moosa: “Gilixih arharhak aniyo” yerhxe.

²² Atin laakin, Tsiyoon kooma kee yane Yallahi daafo kin carshi Yerusaalem kee tamaa xedenih yekette mangah qiyaas hin malaykut,

²³ kee tamaa carshelle migoc akko yunkuttubeh yane riish kin marahi akottalle, amayim balih umman marahi daaniya kin Yalla kee tamaa naqhuse hin mara akko abeh yane xaqqi-waanunti ufayit,

²⁴ kee cusub cahdehi fanti tiya kin Yeesus kee tamaa Abeel biilooko ziyaada meceetih waanisha yimnisnise biilolle kinni temeetiinih taniinim.

²⁵ Tamaa sinlih waanishak yane tiya taabboona xintaanak selita. Amayim lel, tamaa baarholle ten asuuseyaako kaa yaabboona xine mari assaace wayeenik sarrah, carsheeko noolih waanisha tiya naabbo xinnemko, nanu kaako nassaaco dhicno makino.

²⁶ Amaa geddadde kaa dhaw baarho yiniqhniqhe, kado laakin: “Baarho bisa akkekkah, caran gantah malammih gabbaaceh anaqhnaqho kiyo” yerhxeh wacde sayeh yane.

²⁷ Ta: “Malammih gabbaaceh” tarhxe waani lel amneqheeneqhinnixem marto ciloh, tamaa tamneqheeneqhem, amayim lel siraaximtem, tillabtam kinam taybulluwe.

²⁸ Amaydo, amneqheeneqhinnixe nigsinna kabbatno kinomhi sabbatah xamdishinneyaako, xishma kee mashshiilih Yallah kabbaatimta cibaada abno.

²⁹ Amayim lel ni Yalli xiyaa bakta gira kinamhi sabbatah kinni.