Cibraan 10 - Saaho Cusub Cahde

Masiix sadaqha inki gedda umman tiyah

¹ Sercat tamaa tamaato le mecemhi silal kibah, isheh rummah tamaa yane maki. Tayimhi sababah lel tamaa sercat iggida-iggidah laklakalle tamxaye sadaqhah tamaa Yallalle kab-yarhxe marak naqhuse hinam caduruh akko abo mirhiica.

² Akke wayemko, tamaa yacbude mari umman gedih yimsiffiinih yakkeedo, tamaa aban zambeh ten niya ten cadale mirhaarhinna, sadaqha yaxaynim lel xabe dhaarhen.

³ Laakin ta iggida-iggidah aban sadaqhadde zambi xunsus adde yane.

⁴ Amayim lel awura kee dabelti biili zambe yascarhaw akkinnixem kinamhi sabbatah kinni.

⁵ Amayimhi idhdhah, Masiix ta caalamalle yemeete gedda, tahe yerhxe: “Sadaqha kee muttuxuwa mifarhinnito, laakin asiddiqhe nabse yoh tisqirribe.

⁶ Xararishen muttuxuwa kee zambeh aban muttuxuwa ku mixedenishinna.

⁷ Amaa gedda anu: ‘Taykiyo, yi Rabbiyo, tamaa kitaab maqhaddamatalle yi sabbatah akah tunkuttubeh taneekah, ku farhi abo emeeteh aniyo’” erhxe.

⁸ Ta aganim yerhxe gedda: “Sadaqha kee muttuxuwa, xararishen muttuxuwa kee zambeh aban muttuxuwa mifarhinnito, ku gantah mixedenishinna” yerhxe, (tayim tamaa sercatalle akah tomxoyeh taneekah kinni).

⁹ Malammih lel tahe yerhxe: “Taykiyo, ku farhi abo emeeteh aniyo.” Malammit tiya abittodde ashisho ciloh, afti tiya asac-ishe.

¹⁰ Ta Yallih farhih lel inki gedda umman gedih, Yeesus Masiix nabsehi sadaqhahi araxah yinqiddise mara nekkeh nane.

¹¹ Shekh akkinnanti lel, maaxi yamaato ishi khidmah daw-arhxuk, tamaa caduruh zambe asac-ishinnixe muttuxuwa gabbabbaacah yaxaye.

¹² Masiix laakin, inki muttuxuwa umman gedih takkeya, zambeh arhxuk yoxoye gedda, Yallih mizgi gabooko defeyeh,

¹³ aykee kaa nacabtoolitik kaa ibih dokka yakkiinindah ilaalak yane.

¹⁴ Tamaa yinqiddiseh yane marak lel inki muttuxuwah abeh umman gedih naqhuse hin mara akko abeh yane.

¹⁵ Quddus kin Ufayi gantah ni shaahid kinni; tahe lel yarhxe:

¹⁶ “To maxak sarrah, ta cahde kinni tenlih abo liyom, yarhxe Maddari: inni sercat ten afcaadodde hayo kiyo, ten xangaladde lel aktabo kiyo”.

¹⁷ Osah lel: “Ten zambe kee ten sercat-maliini ciyyo lel kamboh azzakkaro makiyo.”

¹⁸ Tayimhi cafuuka alle tanelle, ta zambeh arhxuk aban muttuxuwa kamboh mitane.

Imaan araxah kaamil kin thummut geyaanam

¹⁹ Amaydo, yi saculo, Yeesus biilohi araxah tamaa ummanimko quddus kin makaanodde orobnamhi fidbe neellek sarrah,

²⁰ tamaa usuk ishi nabsehi araxah noh faake golodde cusub aniinahi arax geynek sarrah,

²¹ Yallih carehi bukalle lel naba shekh neellek sarrah,

²² ninni afcaado uma niyaako anasnasah qarcoyishneh, ninni nabse tsitstsii layeh cakalishnemhi sabbatah, mece niya kee imaanah yamiite thummutuh kab-narhxoo.

²³ Tamaa wacde noh sayeti umun kinamhi sabbatah, xumuu-arhxekkah ninni caghi shahaadalle nasbatoo.

²⁴ Ninne-ninneh lel kaxano kee mece ciyyolle sittiya akah uguugusnaakah abnoo.

²⁵ Tamaa xiyawko gari labcad akko abeenih yaniinim balih akkekkah, inkidde yakattiinim mixabinantaaki, tamaa max kab-arhxuk yanem ziyaada inkoh ablitin, sittiya aydukumusanta.

²⁶ Rummaahit irhga kabbatnek sarrah macal kee magoh zambe abaanam katattayishnemko, kamboh zambeh takke sadaqha mitaneeki,

²⁷ xiyaa mashshiisha firde kee tamaa Yallih cangit bakto le dhacuma gira kinni ilalnam.

²⁸ Moosat sercat yarhxem xininnanti, naxrurta hinnim lamma hido adooxa shaahid alle yakkiinih raba.

²⁹ Yallih Barhadde yeeceteti, tamaa usuk akah yinqiddise cahdi biilo lel masxisheti, tamaa nicmat Ufayeh lel waatimeti, ayidhdha amayimko uma maqhtsacti akah eeddah sinalle higgida?

³⁰ Amayim lel: “Xane yafdiinim yim kinni, anu afdaw kiyo” yerhxe tiya naarhigemhi sabbatah kinni. Kataysheh lel: “Maddari ishi xiyaw yafrado kinni” yerhxe.

³¹ Yane Yallahi gabadde radaanam xiyaa mashshishsha.

³² Laakin ifo geyteenik sarrah, tamaa waaxeltaalih dhacuma dhiba adde curten basoohit lelleeca xunsusa.

³³ Wuliili gedda xiyaw nifille wattimteenih sareena sinak raddeyaako biyaakitten, wuli gedda lel ta gina lem geye marahi zooba tekkin.

³⁴ Tashshem kee umman gedih marta iraaro litiinim teerhegiinimhi sabbatah, tamaa tumudhdhuwemih akah tessexekkin, sin iraaro sinak bayshaanam lel xedenlih kabbatten.

³⁵ Amaydo, tamaa naba casbe alle geytan sinni fidbe mixabinanta.

³⁶ Yallih farhi abtan gedda tamaa wacde akah sayeenim kabbattoona ciloh, curtayyi sin farhshiisha.

³⁷ Amayim lel: “Dago waqhtek sarrah, tamaa yamiiteti yamaato kinni, caawito lel maki;

³⁸ yi xaqqi-wanna laakin imaanah maro kinni, caazalle gaxemko laakin, yi rooxi kaalih xedeneena maki” yarhxemhi sabbatah kinni.

³⁹ Nanu laakin tamaa caazalle gaxah yalaye maraako akkekkah, tamaa imaan leh gargeerime maraako kino.