Cibraan 1 - Saaho Cusub Cahde

Yallih Barhahi buka kinni

¹ Yalli dherh muddaako nobowat araxah abeh ni abbubudde mangole gedda mango aruxuh adde waanishe.

² Ta abayshimat lelleecadde laakin, tamaa ummanim yawrishe tiya akko abeh, ta caalam gantah kaa araxah akko yukhluqhe, ishi Barhahi araxah noolih waanisheh yane.

³ Usuk Yallih nabnehi zifo kee igric-ishen kaa khulqhahi xibar le tiya yekkeh, ummannim ishi waanittahi xaylah daw-isha. Zambi tsitstsaye abek sarrah lel, agana yane naba nabne le Yallahi mizgi gabooko defeye.

⁴ Amayim lel usuk yiwrisheh yane migac tenimko meceetih yashshe tiya kinamhi sabbatah, malaykutko mangum naba tiya yekkeh yane.

⁵ Amayim lel Yalli malaykutko awlih tiyak: “Atu yi Barha kito, kaafa ku baaheh aniyo” yerhxeh yaarhige? Hido lel, “Anu kaa abba akko kiyo, usuk lel yi barha yakko kinni” akko yerhxeh yaarhige?

⁶ Malammih lel usuk amaa riish ta caalamalle baaha gedda: “Yallih malaykut inkoh akah yacbadoonaa” yarhxe.

⁷ Malaykutti zacabah lel: “Ishi malaykutuk xaaxatta akko aba, ishi khaddamtek lel girat bola akko aba” yarhxe.

⁸ Ishi Barhahi zacabah laakin: “Ko yi Rabbiyo, ku nugus-defeena, umman gedda kee umman gedih kinni, ku xaqqehi ilo lel ku nigsinnahi ilo kinni.

⁹ Xaqqe tikxineh umaani tincibeh tanito; amaydo Yalli, ku Yalli, ku zoobaako ziyaada xedenti zeetih ku yuskuteh yane” yarhxe.

¹⁰ Amayim balih: “Atu, Maddara, erherhih ta caalam dhishsheyaako, carshit ku gabah ginnimtem kinon.

¹¹ Usun yalawna kinon, atu laakin marto kito; sareena balih lel ziroona kinon,

¹² atu natsala balih ten tatlalo kito, sareena balih yanqayyaroona kinon. Atu laakin lem kito, ku iggidit abayshima yaallo maki” yarhxe.

¹³ Malaykutko: “Ku nacabtoolitik ku ibih dokka akko abandah Yi mizgi gabooko defee” miyak yerhxeh yaarhige?

¹⁴ Usun yakhdume ufayit inkoh tamaa garger yawrasho le mara yakhdamoona farritimteya makini kinoonim?