3 YOHANNIS 1 - Saaho Cusub Cahde

Salaamta

¹ Naba tiyaako, rummah kixiniyo yinkixxine Gaayos fanah.

² Yinkixxinetiyawo, ku rooxi meceetih akah yaneeka balih umman xaaja lel meceetih kottaalih tannaw kee mece caafiyat taallo koh dhaacimak aniyo.

³ Atu rummadde akah gerhak tanitookah, sacul yemeetiinih ku rummah yishhidin gedda, amayim mangum yi xedenishshe.

⁴ Yi cindham rummadde gerhak yaniinim aabbem, tayimko naba xeden maliyo.

Xato kee didde

⁵ Yinkixxinetiyawo; walaa usun cusub mara yakkoona kibah saculuh abak tanitomuh umun kito.

⁶ Usun kaniisat nifidde ku kaxanoh yishhidiinih yanin. Yallah missil araxah ten sukuukuytemko mecem kinni.

⁷ Migac Masiix idhdhah yewciinih yanin, ummatko inkim mikabbaatinnooni.

⁸ Amaydo rummah inkidde khidma nangalo ciloh, ta gina le mara baclayshno nolle tane.

⁹ Anu kaniisa fanah wulim uktube. Diyotrofes, tenadde erherh tiya yakko duumutaya laakin, ni miyaqhbile.

¹⁰ Amaydo, anu emeetemko, usuk abak yane abittot kee umam waanishak ni xamitak yanem, kaa ayzakkaro kiyo. Tayim kaa dhiicamko, sacul kabbaato xina, abo farha mara deesa, kaniisaako lel ten yayyaace.

¹¹ Yinkixxinetiyawo, mecemih kibah umamah mixarassimin. Micim abinnanti Yallaako kinni; umam abinnanti Yalla yubleh miyane.

¹² Demeetriyos umman tiyaako shahaada geyeh yane, rummi gantah isheh akah yishhideh yane. Nanu gantah akah nashhide. Ni shahaada lel rumma kinam teerhegeh tanito.

Abayshimat salaamta

¹³ Kottalle aktube mango xaaja liyo hanuk, qalam kee midad atnaafaco mifarha.

¹⁴ Dheh ku ablo caaga. Af kee afah lel waanishno kino.

¹⁵ Salaam kottaalih yakkoo. Ku kaxantoolit kolle yaysillimin. Ni kaxantoolitille lel tiya tiyah alle iysillim.