2 YOHANNIS 1 - Saaho Cusub Cahde

Salaamta

¹ Naba tiyaako rummah kixiniyo doorimte numa kee tee cindham fanah, yotta busa makiiki laakin inkoh rumma teerhegem gantah sin kixinon,

² tayim lel nottadde sigak yaneh, umman gedda lel yakko kin rummahi sabbatah kinni.

³ Abba kin Yalla kee kaa Barha kin Yeesus Masiixko nicma, raxma kee maaxiyo, rumma kee kaxanodde, nottaalih yakkoona kinon.

Rumma kee kaxanodde gerhaanam

⁴ Abbaako kabbatne amre balih, ku cindhamko gari rummadde gerhak yaniinim ten geyemhi sabbatah, amayim mangum yi xedenishshe.

⁵ Timxishshime numa kado lel erherhko liinuk nine tiya kibah cusub amre kolle aktubiyuk maaniyo. Amayimih lel sittiya nakxano ku essera.

⁶ Tatiya kinni lel kaxani, kaa amrit kataak gerhnam. Tatiya kinni amri, tamaa erherhko akah toobbiiniikah kayyadde gedhdhoona.

⁷ Mango doolab-le mari, Yeesus Masiix nabse yekkeh yemeetem aaliminnexeya, caalamalle yewciinih yanin. Tagina leti lel doolab-le tiya kee masiix-didde kinni.

⁸ Kaamil kin casbe kabbattoona ciloh laakin, tuttukhuddumiinim taylaynimko sinne ubula.

⁹ Acrhiyinnantiya kee Masiix aydarasadde siginnexe tiya, Yalla male. Ta aydarasadde siginnanti, Abba kee Barha inkoh le.

¹⁰ Ta aydaras baahinnexe tiya sinni caredde mikabbaatina, “salaam” yakkeedo akko marhxina.

¹¹ Kayyak “salaam” ayinnanti lel kaa uma abittotudde kaalih yasheereke.

Abayshimat salaamta

¹² Sinalle aktube mango xaaja liyo hanuk, waraqhat kee midad atnaafaco mifarha. Amayimhi idhdhah laakin sinalle emeeteh af kee afah sinlih waanisho caaga. Amayim lel ni xeden kaamil yakko ciloh kinni.

¹³ Doorimte ku saclahi cindham lel kolle yaysillimin.