2 Timoteyos 4 - Saaho Cusub Cahde

Waanitta warroyish

¹ Yalla kee tamaa tanem kee rabtem yafrado yamiite Masiix kin Yeesus nifille, kaa mumut kee kaa nigsinnah ku asuusak aniyo:

² tamaa waanitta warroyish, koh takke gedda kee kolle takke geddah tinqirribeh sug, fayish, cadal, asus, umbuka sabreelih aydukumusaaki labcaadish.

³ Xiyaw tamaa ten cokkak akah yaabbo duumutaanam akah warisha mudarrisiin yaskattiinim kibah, tamaa rummaahit mazhab adde curoona farhinnixon max amiituk yane.

⁴ Rumma yaabbiinimko mirix-yerhxiinih, tinem-tinet gabolle shax-ishitoona kinon.

⁵ Atu yekkemko, umman gedda himma-abit, uma gedda curtayyo abit, mece ware warroysha tiyahi ciyyo abit, ishi khidma iskimil.

⁶ Anu yekkemko, mece geddaakoh sadaqhat macaba balih xarhiteh aniyo, adde adiye maaxi lel gufeh yane.

⁷ Anu mece gixlo ingixile, ammakaakam lel abaysheh aniyo, amaa imaan lel dhawrheh aniyo.

⁸ Kamboh, tamaa xaqqi daaniya kin Maddari, amaa maxadde yoh yaxaw le xaqqi bor yoh yinqirribeh yane. Tayim lel yottah bisa makiiki, tamaa inkoh kaa mumut kixin marah gantah kinni.

Masxassa

⁹ Dheh akah yolle tamiiteekah ab.

¹⁰ Deemaas ta caalam yikxinemhi sabbatah, yi xabeyaako Tessaloniike fanah yedee. Kereeskes Galaatiya fanah, Tiitos lel Dalmatiya fanah yedeynih yanin.

¹¹ Luukas inkettak yottaalih yane. Markos khidmadde yi yimficemhi sabbatah isheelih kaa bah.

¹² Tikhikos Efesos fanah kaa dhirhiyeh aniyo.

¹³ Tamiite gedda, tamaa Tirooyasalle Karboslih xabe kabba, kitob, fertoh lel tamaa qarbat luuxa isheelih yoh bah.

¹⁴ Tamaa bacal gibre kin Aleksaander mangum yoh yoome. Maddari lel kaa abittot balih akah yafdaw kinni.

¹⁵ Usuk dhacumaatih ni fartoh didde kinamhi sabbatah, atu isheh akko zeelit.

¹⁶ Tamaa erherh yi mogtelle inkoh yi xabeeninkah walaa inketti daw yottaalih marhxinna. Tayim umaanidde akko loyyiime waytoo.

¹⁷ Farto yi araxah sittiyadde warreyto, inkoh Aki-mari lel yaabboona ciloh, laakin Maddari yottaalih daw-yerhxeh yi yiysiriye. Lubak afko lel yi yeyyeece.

¹⁸ Maddari umbuka uma abittooko yi yeyyeeceh nagaadde ishi carshi nigsinnalle yi baaho kinni. Kayyah umman gedda kee umman gedih nabne takkoo. Amin.

Abayshimat salaamta

¹⁹ Biriskilla kee Akiila, amayim balih Oneesiforosti xawazalle salaamat akko yoh erhexa.

²⁰ Erastos Korintosulle raaceh yane. Tiroofimos lel laxuuteyaako Mileetosulle kaa xabeh aniyo.

²¹ Dhamxin waqhteeko basolle akah tamiiteekah ab. Eybuulos, Budees, Linos, Kilawdiya kee aki sacul inkoh kolle yaysillimin.

²² Maddari ku ufaylih yakkoo. Nicma sinlih takkoo.