2 Timoteyos 3 - Saaho Cusub Cahde

Uma waqhte abayshimat lelleecadde

¹ Abayshimat lelleecadde laakin, uma waqhti yamaato kinam irhig.

² Xiyaw ishe kixin mara, solaadi kixin mara, falita mara, yamnanabbe mara, waatimeenit, sinni dhaltoyya aabbinnixe mara, cawat hin mara, anqaddas hin mara,

³ naxrurta hin mara, cafuuka hin mara, xiyaw migac caynisha mara, sinne abbirhinnixe mara, biilo malit, mecaani nicib mara,

⁴ thallaamaat, macal hin mara, amnonobbah xaffuwe mara, Yalla yakxiniinim hidhdhah raaxa kixin mara,

⁵ irooko Yallih mashshi lemih higgidon, laakin kaa xayla mikabbaataana. Tagina le maradde kab-marhxin.

⁶ Tenadde, xiyaw carwadde xololaanah orobanyaako, zambi alle yiclisheh barhsimte uma farhih arax xabte kas hin sayyoh yindhibbirhe mara kinon.

⁷ Ta sayyo umman gedda yadrusin hanuk, tamaa rumma yaarhagoona taane mara kinon.

⁸ Tamaa Yannees kee Yamberees Moosat didde akah yekkiiniikah, ta xangal akko masxiteh sinni imaanah racte labha gantah amayim balih rummaati didde yekkiinih yanin.

⁹ Tamaa lamma labhatto balih, ta marahi duudiino gantah umman tiyah caddoyto kibah, tayimko tillaabeenih gufanikke male.

Kutuub inkoh Yallih ufayeko tewcem kinni

¹⁰ Atu laakin, yi mazhab, yi gerh-gerh, yi bursaale, yi imaan, yi curtayyo, yi kaxano, yi asbat katayte.

¹¹ Amayim balih lel yi hadaano kee yi waaxelta. Anu lel Anthaakiya, Ikooniyon kee Listiralle yolle tekke hadaano cure. Umbuka tenko laakin Maddari yi yeyyeece.

¹² Rummah lel, Masiix kin Yeesusuh Yallih araxalle maro farha mari inkoh haddaanimoona kinon.

¹³ Tamaa uma mara kee yammeseesele mari laakin, doolabak kee doolabimak umaaniiko umaanille yadiinim dhuguugulusoona kinon.

¹⁴ Atu yekkemko laakin, tamaa tudruseh tanitom kee teerhegeh tanitomulle isbit. Tamayim miyaako tudrusem lel taarhige.

¹⁵ Cindhituk erherhishsheh, Masiix kin Yeesusudde abitan imaanhi araxah yamiite garger akah taarhago ku dhicshiisha Quddus kin Kutuublih temeerhegeh tanito.

¹⁶ Kutuub lel inkoh Yallih ufayeko tewcem yekkeh, aydaras, cadaleh, aymociya kee xaqqeddehi labcaadishih yamfice.

¹⁷ Amayim lel Yallih xiyawti kaamil yekkeh, umbuka mece abittoh yakkataw ciloh kinni.