2 Timoteyos 2 - Saaho Cusub Cahde

Masiix kin Yeesus mece caskarto

¹ Amaydo atu, yi barhaw, Masiix kin Yeesus araxah geytimta nicmadde isrii.

² Tamaa mango shohodah nifille atu yottaako toobbem, garo taydaraso dhicta umunaat kin maralle amaanah uxuu.

³ Masiix kin Yeesus mece caskarto tekkeh lel waaxelta yottaalih xazziilit.

⁴ Caskarto kin tiyahi bursaale tamaa kaa yisciskire tiya xedenisho kinamhi sabbatah, shacabti nabradde mixungugguubuwa.

⁵ Yammokookometi lel tamaa obsa balih ammookome wayemko, ashshowaati bor migeya.

⁶ Orobe ilawko afti gide kabbaato missilti, tamaa xawaleena kin xarastaa kinni.

⁷ Maddari ummanimhi fahaama koh yaxaw kinamhi sabbatah, anu kok arhxuk aniyomudde adde exeeseb.

⁸ Tamaa anu warroysha mece waredde akah warroysheekah, Dawud zara kin, rabaako ugute Yeesus Masiix xunsus.

⁹ Ta mece warehi sabbatah kinni lel cagab-wanna balih umudhdhuweh, cazaab abliyuk anem. Yallih waanitta laakin maamadhdhayinna.

¹⁰ Amaydo, tamaa doorime mari, Masiix kin Yeesus araxah umman geedit nabneelih garger geyoona ciloh ummanim curak aniyo.

¹¹ Ta marhxo rumma kinni: Kaalih rabneh nekkemko, kaalih gantah marno kino;

¹² Curnemko, kaalih gantah nangaso kino; kaa xinnemko, usuk gantah ni xino kinni;

¹³ umunaat akke waynemko, usuk umunuk raaca, amayim lel usuk ishe xino mirhiicamhi sabbatah kinni.

Yalli akah yishhide khaddaam

¹⁴ Tamaa yaabbe mara bisa taylaye, amficinnixe waanih zacabah yankeexediinimko, Yallih nifille ten asussak, tayim ten xunsus.

¹⁵ Rummi waanitta araxah yabbirheh, akah xoolashshiitam hin tiya kee akah yishhidin khaddaam balih, Yallah ishe akah taxayeekah ab.

¹⁶ Tamaa diin hin marih tharhqamqamko mirix-erhex. Amayim lel tayim ziyaada Yallih mashshih waytolle ten beyto kinamhi sabbatah kinni.

¹⁷ Ten waani lel urinnixe biyaake balih faax-tarhxo kinni. Ten fanadde lel Himenayos kee Fileetos geytiman.

¹⁸ Usun rummaako yicrhiyiinih: “Rabaakohi ugut mece geddaakoh yekkeh yane” arhxuk, xiyawko garohi imaan wahanak yanin.

¹⁹ Yisbite Yallih masarrat laakin maxtam yooqhoceyaako: “Maddari tamaa kaa mara kin xiyaw yaarhige”, amayim balih: “Inkoh Maddari migacah deecima mari umaaniiko mirix-yarhxoonaa” yarhxe.

²⁰ Naba caredde dahab kee fiddaako siraaxime nuwaa bisa akkekkah, boxo kee kallaako siraaximtem gantah yane. Tayimko gari naba nafaacadde, gari lel cindha nafaacadde asa.

²¹ Amaydo, akkinnanti tayimko ishe yiytsitstsiyemko, naba nafaacadde asa nuwatta yakko kinni, quddus yakkeh lel ulah obsima, cari wannahi nafaacadde asah lel, umbuka mece abittoh yinqirribe tiya yakke.

²² Amaydo, gufayinni farhiiko kudaaki, tamaa tsitstsii afcaado le mari Maddarah deecimayaalih, xaqqe, imaan, kaxano kee salaam katattaa.

²³ Zagaxa katayishsham akko taarhige duudiino kee amficinnixe ankaaxadko mirix akko erhex.

²⁴ Maddari garuzzo kinti, zuggux yakko kaalle mitaneeki, umman tiyaalih mece tiya, yaydaraso dhiica tiya, sabreelih umaani curo dhiica tiya,

²⁵ kaa didde kin mara xeelaatih yadabbo dhiica tiya yakko kaalle tane. Yalli rumma yaarhagoona ciloh, tooba akah axaye le.

²⁶ Usun lel kaa farhi aboona ciloh, ten tibbirheh tine ibliis machchawaadiyaako kudeenih sinni afcaadolle gaxoona kinon.