2 Timoteyos 1 - Saaho Cusub Cahde

Salaamta

¹ Masiix kin Yeesus araxah geytimta aniinat cagah, Yallih farhih Masiix kin Yeesus fartotta yekke Bawlosko,

² kixiniyo yi barha kin Timoteyos fanah, Abba kin Yalla kee ni Maddara kin Masiix kin Yeesusko nicma, raxma kee maaxiyo koolih takkoo.

Amaanah kolle yomxoye obsa dhawurh

³ Bar kee lellecih dhuguuguluh inni dhaacodde ku xunsuusak, tamaa yi abbub akah abeeniikah inni cado-qalbeh akhdume inni Yallah xamde addabbe.

⁴ Ku dhiimo xunsuusak, xedenih ammaago ciloh, ku ablo koh saanak aniyo.

⁵ Tamaa kottadde yine rummaahit imaan xunsuusak aniyo. Ta imaan lel erherhih ku ingo kin Loyis kee ku ina kin Ewniikedde yine, kado lel kottadde yanemih thummut kiyo.

⁶ Tayimhi sabbatah, tamaa anu gaba kolle hayeyaako kabbatte, kottadde tane Yallih muttuxuwa hadig-ishsho ku xunsuusak aniyo.

⁷ Yalli noh yoxoyem, xayla, kaxano kee ninne akah nabbirhe ufaye kibah, gilixti ufaye maki.

⁸ Amaydo, ni Maddarahi zacabah yashhidiinimih hido lel kayyah arhxuk maxbuushsha yekke yottah mixoolashshiitinaaki, tamaa Yallih xaylah mece wareh arhxituk yottaalih waaxelsit.

⁹ Usuk ni gargeereyaako quddus kin deecoh noh deecimem, ni ciyyohi sabbatah akkekkah, ishi farhi kee ishi nicmahi sabbatah kinni. Amayim lel, waqhti erherhekkah Masiix kin Yeesus araxah noh yoxoye.

¹⁰ Tayim lel tamaa ni Gargeereena kin Masiix kin Yeesus mumut hi araxah caddoyteh tane. Usuk raba soolisheh, aniina kee rabe wayaanam mece warehi araxah ifolle yeyyeece.

¹¹ Yottak lel ta mece warih warroysheena, fartotta kee mudarris yok aben.

¹² Tayimhi sabbatah kinni lel cazaab abliyuk anem. Miyah eemeneh aniyom aarhigemhi sabbatah laakin mixoolashshiita. Tamaa amaanah yolle tomxoyeh tanem amaa lellec fanah usuk yoh dhawrho dhiicamah lel thummut kiyo.

¹³ Masiix kin Yeesus araxah geytima imaan kee kaxanoh, tamaa yottaako toobbeh tanito mece waanih misaal katattaa.

¹⁴ Tamaa amaanah kolle yomxoyeh yane mece obsa, tamaa nottadde sigeh yane Quddus kin Ufayeh dhawurh.

¹⁵ Tamaa Aasiyalle yine mari, Figelos kee Hermogenees adde geytimanya, inkoh yi yithlimiinim taarhige.

¹⁶ Oneesiforosti xawaz Maddari raxmah ten yaarhagoo. Usuk yi madhdhuwaako xoolashshiitekkah, mangole gedda yi yuscurufeh kinni.

¹⁷ Roomalle yemeete gedda lel, macal kee magoh yi wagiyeh yi geye.

¹⁸ Maddari amaa lellec Maddaraako ishi raxmah kaa yaarhagoo! Usuk Efesosulle abe khidma lel atu inkoh meceetih taarhige.