2 Tessaloniike 3 - Saaho Cusub Cahde

Dhaaco noh abanta

^1-2 Abayshimalle, ni saculo, Maddari waanitta tamaa sin fanadde akah tekkeh taneekah, faax-tarhxo kee tanabo; ummanti yaamine tiya makinamhi sabbatah, mangum uma maraako naggoyno dhaaco noh abanta.

³ Laakin Maddari umun kinni. Usuk sin yaysabato kee uma tiyaako sin dhawrho kinni.

⁴ Tamaa nanu sin naamirem abak taniinim kee abtoona kitiinimih, sin zacabah Maddaradde imaan lino.

⁵ Maddari Yallih kaxano kee Masiix araxah geytima curtayyolle sin afcaado santishoo.

Bohosa kin adabe hin maraakohi asuuso

⁶ Kado lel ni saculo, tamaa nottaako kabbatten labcadah adiinnixe, buhus kin adabe hin sacalko barhsimtoona, ni Maddara kin Yeesus Masiix migacalle sin aamirinuk nane.

⁷ Nanu sinlih nine gedda, abboohosinuk mininem taarhigiinimhi sabbatah, nottah tammangadoona sinalle tanem atin sinneh taarhigin.

⁸ Sinko walaa inkettalle cuuka nakkemko, bar lellecih akhduminuk, tannah xawalak ninenkah, walaa inkettaako amaa ginah folotta mibeetino.

⁹ Tayim lel sinah misaal nakko kee atin nottah tammangadoona ciloh kibah, ninneh eeddam geyno xaqqe malinoh maki.

¹⁰ Amayim lel, nanu sinlih nine gedda: “Yashtaqhalo farhinnixeti, beete wayo” yarhxe amre sinah noxoyeh ninemhi sabbatah kinni.

¹¹ Sin fanadde yane maraako gari bohosa kin adabe malit, ciyyo hinam kee ten farhshiishinnixemidde saya mara kinoonim naabbe.

¹² Tagina le marak lel, xeelatah sinni ciyyo abiteenih sinni folotta bahitoona, Maddara kin Yeesus Masiix araxah ten naamireh ten asusna.

¹³ Atin yekkemko, ko ni saculo, mecaani abaanam mibaddaahishina.

¹⁴ Nanu ta jawaab araxah narhxem aabbinnixeti yinniyemko, xoolashshiito ciloh, adde mangalinanta.

¹⁵ Sacal balih kaa fayshanta kibah lel, cange balih kaa mablinanta.

Salaaxa

¹⁶ Amaydo, maaxiyot Maddari isheh umman ginah, umman gedda maaxiyo sinah yaxaw. Inkoh Maddari sinlih yakkoo.

¹⁷ Ta salaamta, anu, Bawlos, inni gabah uktube tiyä kinni. Tayim lel, inkoh jawawubhi tuumar kinni; amayim lel tamaa anu akah aktube xibar kinni.

¹⁸ Maddara kin Yeesus Masiix nicma lel umbuka sinlih takkoo.