2 Tessaloniike 2 - Saaho Cusub Cahde

Maddari lellecko basolle takko lem

¹ Kado lel, ni saculo, ni Maddara kin Yeesus Masiix gaxnan kee nanu kayyalle nacshalo kinomuh tayim sin esserna,

² ufayeh hido waanih hido nottaako temeetemih yiymingidin jawaabah, Maddari lellec gufeh yane terhxiinih mamrabbashina hido mibirriiginanta.

³ Farhinnan ginah walaa inketti sin doolabe wayoo. Amayim lel yookomeh Yallih xinayyi amiitekkah, sercat-male kin xiyawti liyaati barha kinya lel amidhdhigekkah, amaa maaxi yamaato makinamhi sabbatah kinni.

⁴ Inkoh yalla akko yarhxiinim kee akah yacbudiinimko aganalle ishe yabbirheh Yallih didde kinti kayya kinni. Usuk lel sarreh Yallih macbadadde defeyah “Anu Yalla kiyo” yarhxe.

⁵ Anu sinlih iniyo gedda, tayim sinah warishak mixunsussaana?

⁶ Usuk tamaa ishi geddalle yamadhdhago ciloh, kado ayim kaa deesak tanem taarhigin.

⁷ Amayim lel sercat-maliini mashthir mece geddaako ciyyodde yanemhi sabbatah kinni. Tamaa kado deesak yaneti araxko akah yacrhiyendah deesimo kinni.

⁸ Taymik sarrah, tamaa Maddara kin Yeesus ishi afko yawce hanrah yaylaw-le sercat-mali yamadhdhago kinni. Ishi mumut hi xibarah lel kaa yaylawo kinni.

⁹ Tamaa sercat-mali mumut lel tamaa inkoh Sheethan ciyyoh; umman xayla, zirabti ishaarar kee bexsishsham abak yakko kinni.

¹⁰ Usuk tamaa alawuk yane mara akah yaylalaye umbuka uma doolab leya. Amayim lel gargeerimoona ciloh rumma akxine wayeenimhi sabbatah kinni.

¹¹ Amaymih, usun zirab yaamanoona ciloh Yalli dhacuma aylolowa alle dhirhiya.

¹² Tayim lel, tamaa rumma aamine waye mari, xaqqe akkinnixemih lel xedene waye mari inkoh yanqatstsacoona ciloh kinni.

Igrira

¹³ Laakin, Maddari kixin ni saculo, Ufayi araxah tinqiddisinyaako rumma teemeniinih afti daro tekkiinih gargeerimtoona Yalli sin dooremhi sabbatah, nanu umman gedda sin idhdhadde Yallah xamde naddabbo noh eedda.

¹⁴ Atin ni Maddara kin Yeesus Masiix nabne geytoona ciloh, tamaa nanu warroyishna mece warehi araxah sinah deecime.

¹⁵ Amaydo, ko ni saculo, tisbitiinih daw-erhexa, tamaa ninni afhi waanih yakko, jawaabah sin labcaadishnem lel qath-ishsheenih ibbirha.

¹⁶ Kado, isheh ni Maddara kin Yeesus Masiix kee tamaa ni kixinah, ishi nicmah umman geedit aydukumusnan kee mece cag noh yoxoye ni Abba kin Yalla,

¹⁷ sin afcaadoh aydukumusnan yoxoynih, umman mece abitto kee tarhxin waanih sin yaytararoonaa.