2 Tessaloniike 1 - Saaho Cusub Cahde

Salaamta

¹ Bawlos, Silas kee Timoteyosko, ni Abba kin Yalla kee Maddara kin Yeesus Masiixidde tane Tessaloniikeeti xiyawhi kaniisa fanah:

² Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Xamde

³ Ni saculo, sin imaan meceetih anabuk, umman tiyak sittiyah litin kaxani lel ammanguk aduuk yanemhi sabbatah umman gedda sin idhdhadde Yallah xamde nadabbo nolle tane.

⁴ Amaydo, nanu ninneh, sin agrar kee imaanah, umbuka sinni hadaano kee biyakadde litin curtayyoh, tamaa Yallih kanaayisidde sin zacabah falitak nane.

Masiix gaxnanallehi firde

⁵ Yallih nigsinna akah eedda mara takkoona ciloh, atin gantah waaxelsiitak taniinim, Yallih firdi xaqqe kinamah seththe kinni.

⁶ Tayim Yalli xaqqeh yublek sarrah, tamaa sin biyaaka marah biyak akah yafdaw kinni.

⁷ Maddara kin Yeesus tamaa ishi naba malaykutlih carsheeko bololta giraalih yambulluwe gedda, biyaakita sinah, amayim balih nottah curfen yaxaw kinni.

⁸ Tamaa Yalla sorha mara kee ni Maddara kin Yeesus mece ware aabbinnixe maraako xane akko yafdaw kinni.

⁹ Usun Maddari nifko yakko kaa nabneh xaylaako mirix-yarhxoona kee umman geedit liyah yanqatstsacoona kinon.

¹⁰ Tayim lel sinah abne shahaada kabbaatimtemhi sabbatah, usuk yinqiddise ishi marah yanabeh, tamaa yaamine mari lel adde kaa yassokootin maxadde takko lem kinni.

¹¹ Tayim takko lel, ni Yalli ishi deecoh eeda mara sinak abo, umman gedda dhaaco sinah abak nane. Ishi xaylah lel tamaa mecaani abtoona litin farhi sinah yaskamalo, umman gedda dhaaco sinah abak nane.

¹² Amayim lel ni Yalla kee Maddara kin Yeesus Masiix nicmahi araxah, ni Maddara kin Yeesus migac yanabo, atin lel kaa araxah tanaboona ciloh kinni.