2 Korintos 9 - Saaho Cusub Cahde

Yaamine marah Yerusaalemille yamxaye xato

¹ Kado, tamaa yinqiddise marah takke khidmahi zacabah sinalle aktubem mifarhshishsha.

² Amayim lel atin xattimtoona litin mece farhi aarhigemhi sabbatah: “Akhaayalle tane sacul xattimoona boodifaako taahe yinqirribiinih yanin” arhxeh sin zacabah Makedooniyaati xiyawalle falita. Sin qeera lel tenko mango mara uguugusse.

³ Laakin tamaa sin zacabah ta gondodde abne falo foyya takkemko, anu akah erhxeekah tinqirribiinih sugtoona, amaa sacul sinalle farak aniyo.

⁴ Akke wayemko, Makedooniyaako gari yottaalih yemeetiinih, atin anqirribekkah sugteenimko, sin zacabah abne imaanah, notta bisa akkekkah, atin gantah xoolashshittaanamko ciloh kinni.

⁵ Amaymih, tamaa tookomiinih taxawna wacde akah sayten muttuxuwa tinqirribeh sugto ciloh, amaa sacul yookomiinih sinalle yamaatoona ten dhaacimo farhshishsham yoh tumbulluwe. Taginah lel sinni winah kibah xaylah abteenim makinam tamidhdhige.

Xedenak yaxaye tiya

⁶ Gondo tatiyä kinni: daddagumuh yazriyeti daddagumuh orbisho kinni; mangih yizriyeti lel mangum orbisho kinni.

⁷ Yalli xedenak yaxaye tiya kixinamhi sabbatah, ummanti farhekkah hido xaylah akkekkah, ishi afcaadodde akah yexeesebeekah yaxaw kaalle tane.

⁸ Yalli ummanimidde sin farhshishsham umman gedih geyteenih, umman mece abitto taymangoona ciloh, nicma sinah yaymango dhiica.

⁹ Amaymih tayim tunkuttubeh tane: “Usuk amaa ginah kele, usuk baaxentitih yoxoye; kaa xaqqi umman geddah mara.”

¹⁰ Tamaa yazriye tiyah zara, teeloh lel folo yaxayeti, atin tazriin zara sinah yeymengeh, sin xaqqih orba lel sinah ziyaadisho kinni.

¹¹ Umman gedda xinda-le mara takkoona, umman ginah sin gaddaalisho kinni. Usun lel ni araxah Yalla xamdishitoona kinon.

¹² Ta atin abak tanin khidma, tamaa yinqiddise marah farhshishsham yaxaynim bisa akkekkah, Yallah xadde hin mango xamde akah gaxtaakah yakkeedo abtam kinni.

¹³ Ta atin abak tanin khidmah, mango mari Yalla yaynaboona kinon. Amayim lel tamaa atin Masiix mece wareh abten shahaadaako tamiite maabboh, amayim balih inkoh ten kee aki marah atin xindaalih abten xatohi sabbatah kinni.

¹⁴ Tamaa sinah tomxoyeh tane qiyaas hin Yallih nicmahi sabbatah, mango kaxanoolih dhaaco sinah aban.

¹⁵ Tamaa taye kinni yerhxiinih adde waanishoona taanan kaa muttuxuwah, Yallah xamde takkoo!