2 Korintos 8 - Saaho Cusub Cahde

Xindah yaxawna aydukumusaanam

¹ Yi saculo, Makedooniyaati kanaayisidde tomxoye Yallih nicma taarhagoona sinak farhna.

² Amayim lel, naba cakanah tsabaabadde dhacuma wayto luuk yinin hanuk, wasan hin xeden loonimhi sabbatah, wasan hin xinda-le mara kinon.

³ Sinni farhih sinni dhicille, sinni dhicko gantah bukalle yoxoynimih inneh shaahid kiyo.

⁴ Yinqiddise marahi xatoh takke khidmadde macruufuh gaba yassagalloona dhacumaatih ni dhaacimen.

⁵ Tamaa nanu akah ilalneekah akkekkah lel, erherhih Maddarah, sarrah lel Yallih farhih nottah sinne yoxoyin.

⁶ Amayimhi idhdhah, tamaa akah erherhisheh yineekah, ta xindaati abitto abayshima gudduuso, Tiitos dhaacimneh nanino.

⁷ Tamaa ummannimih yashshe mara akah kitiiniikah: imaanah, waanih, irhgah, ummanimidde mece farhi kee nottah litin kaxanoh, ta xindaati abitto gantah yashshe mara tika.

⁸ Tayim arhxem sin aamaro akkekkah, laakin aki marahi mece farhiilih oybolooloyeh, sin kaxani rumma kinam kee amarmaro ciloh kinni.

⁹ Ni Maddara kin Yeesus Masiix nicma taarhigin; atin kaa waytoh gaddaalittoona ciloh, gaddaale kinni hanuk sinah arhxuk baaxite.

¹⁰ Anu ta gondodde sinah mecemih liyo mablo tatiya kinni. Atin boodifa yaxaynim erherhishshen bisa akkekkah, taxawna gantah farhi luuk tinin.

¹¹ Amaydo kado, tamaa ciyyo abayshanta. Amayim lel tamaa abtoona luuk tinin farhi, ciyyot abayishnanlih tamsaanawo ciloh, sinni dhic balih abanta.

¹² Farhi tinniyemko, amaa muttuxuwa kabbaatimtam xiyawti lem balih kibah, aalle wayam balih maki.

¹³ Tayim lel tenah akah tar-hawo, atin lel waqhaaqhacittoona erhxeh akkekkah, agaagim yannaw alle tanemhi sabbatah kinni.

¹⁴ Sin xayi kadit waqhtedde ten farhshishsham taskamalo, ten xayi lel sin farhshishsham tiskimileh agaagim yannaw ciloh kinni.

¹⁵ Amaymih lel: “Mangum yesketteti raacishem male, dagum yesketteti lel wayto male” yarhxiinim tunkuttubeh tane.

Tiitosti sukuuku

¹⁶ Tamaa anu sinah liyoh iggidin mece farhi Tiitosti afcaadodde haye Yallah xamde takkoo.

¹⁷ Tiitos ni dhaacimto kabbaate bisa akkekkah, laakin ishi winah kinni mece farhiilih sinalle amiituk yanem.

¹⁸ Kaalih lel mece warehi warroyishnanah umbuka kanaayis yassokootin sacal sinalle dhirhiyak nane.

¹⁹ Amayim bisa maki, Maddari nabne kee xatoh lino mece farhi nayballaw ciloh muttuxuwa nasxadaadaro abna gerhodde ni goorisho kanaayis kaa dooreenih yanin.

²⁰ Tayim lel ta xinda-mece muttuxuwa asxedeederinuk caddaalimnamko ciloh abnam kinni.

²¹ Ni bursaale lel Yallih nifille bisa akkekkah, xiyaw nifille gantah mecaani abaanam kinni.

²² Mangole gedda mangumudde kaa nimirmireyaako mece farhi lem akko neerhege aki sacal gantah tenlih sinalle dhirhiyak nane. Kado lel sina meceetih yeemenemhi sabbatah awwalko ziyaada mece farhi abiteh yane.

²³ Tiitos yekkemko, usuk yi zoobatto kee sin nafaacah yottaalih khidma yangale tiya kinni. Ni sacul yekkemko lel, Masiix nabneh kanaayis faren mara kinon.

²⁴ Amaydo, ta mara sinni kaxano kee nanu sin zacabah akah falinnem tamaa kanaayisti nifille ten uybulluwa.