2 Korintos 7 - Saaho Cusub Cahde

¹ Yi kaxantoolito, inkoh ta wacde neellek sarrah, tamaa nabse kee ufaye xaraameeko ninne niysiffiyeh, Yalla mashshinneh ninni anqaddasak kaamil akko abnoo.

Bawlos xeden

² Sinni afcaadodde cara noh abanta. Nanu walaa inkettalle maqhlathino, nanu walaa inketta micaynishino, nanu walaa inkettadde mamballatsino.

³ Anu tayim sin cadalo arhxem maki. Tamaa ookomeh akah sinak erhxeekah, atin ni afcaadodde tanin, rabneh inkidde hido ninniyeh inkidde nane.

⁴ Anu cadimbililih sinlih waanishak aniyo; anu mango cafad sinak liyo; sinko naba rufto geyeh aniyo. Tamaa inkoh ni tsabaabaalih, yi xeden wasan male.

⁵ Makedooniya gufne gedda gantah, ummanille nentseebebenkah, ni nabsi curfen luuk miyine. Irolle dhiba, addadde lel mashshi luuk nine.

⁶ Tamaa niya cide marah rufto yaxaye Yalli laakin, Tiitosti mumutlih rufto noh yoxoye.

⁷ Tamaa usuk sinko geye ruftoh gantah kibah, kaa mumutuh bisa maki. Yi saana litiinim, sin xazan, yottah litin qeera noh warishe; amaymih anu ummanimko mangum xedene.

⁸ Anu inni jawaabah sin isqidibehaaki, amayimih maththeecese. Walaa dago geddah bisa yakko kibah, amaa jawaab sin tisqidibem ublemhi sabbatah laakin, eththeeceseh ine.

⁹ Kado laakin xedenak aniyo; amayim laakin atin tiqhdibiinimih akkekkah, tataaboona tiqhdibiinimhi sabbatah kinni. Atin Yallahi farhih araxah tiqhdibin, amaymih lel ni araxah mammacammajitiini.

¹⁰ Yallahi farhih araxah yamiite qadaab, thacasa hinnim gargerille xiyaa baaha, caalamti qadaab laakin rabille xiyaa baaha.

¹¹ Yallih araxah yamiite qadaab ayim sinadde baaheh yanem ubula: aaginale mece farhi, aaginale mogte, aaginale kura, aaginale mashshi, aaginale saana, aaginale qeera, aaginale qitscat! Umman taymille barii kitiinim tuybulluwin.

¹² Amaydo, anu sinalle aktubem, cagab abe tiya hido cagab akko aben tiyahi zacabah erhxeh maki. Laakin atin nottadde litin mece farhi Yallih nifille sinah tamadhdhago ciloh kinni.

¹³ Amaydo, nanu rufto geyne. Ni ruftooko ziyaada lel, atin inkoh kaa ufaye akah tuscurufiinimhi sabbatah, Tiitosti xedenille nanu ziyaada xedenneh nane.

¹⁴ Anu sin zacabah kayyalle faliteh anem tinniyemko, yi mixoolayshitiini. Tamaa nanu sinak nerhxem inkoh rumma kinni. Tiitosulle abne falo gantah rumma kinam timidhdhigeh tane.

¹⁵ Inkoh kaa toobbiinih, mashshi kee arharhoolih aaginah kaa kabbatteenim xunsuusak, usuk sinah leya kaxani gantah naba tiya kinni.

¹⁶ Anu sin bukalle naba imaan liyomhi sabbatah, xedena.