2 Korintos 6 - Saaho Cusub Cahde

¹ Yallaalih inkidde yashtuqhule mara kinoyaako, Yallih nicma kabbattenyak foyya akko abe waytoona sin dhaacimak nane.

² Amaymih lel tayim yarhxe: “Mece waqhtedde ku oobbe, gargerti maxadde lel ku xate.” Taykinna, kadi mece waqhti kinni; taykinna, kado gargerti maaxi yekkeh yane.

³ Ni khidma caddaalimtamko ciloh, akkinnan tiyahi araxadde andafo mihayna.

⁴ Laakin, umman ginah Yallih khaddamte kinoyaako: naba curtayyoolih, tsabaabadde, uma nabra, balaalih;

⁵ utka, xabshe, cigirgir, xawal, dhinti wayto kee safraalih;

⁶ lillaalih, irhga, sabre, mecaani, Quddus kin Ufaye, rummaahit kaxanoolih;

⁷ rumma kin waani kee Yallih xaylah; mizga kee guri gabadde xaqqi aslaxaalih;

⁸ xishma kee xishmat waytot araxah, ayra kee faylat araxah ninne naysherheerhege. Notta maylalayit balih kinni ni yabliinim, nanu laakin rummadde nane;

⁹ amidhdhiginnixe mara balih ni yablin, nanu laakin mudhdhugaat kino; rabak yane mara balih ni yablin, taykinna, nanu laakin kaddih wafaalih yane mara kino; yinqitstsice mara balih ni yablin, nanu laakin, ni yigdifiinih miyaniini;

¹⁰ xazzanoye mara balih ni yablin, nanu laakin umman gedda xedeneenit kino; baaxentit balih ni yablin, nanu laakin mango marah gadda abna; inkim hin mara balih ni yablin, nanu laakin ummannim lino.

¹¹ Korintosti xiyawo, nanu ninni finjah sinlih waanishneh nane; ni afcaado lel sinah fidinih fakkitteh tane.

¹² Sina kinni kaxano nottaako dessem kibah, ni kaxani sinko mideesimo.

¹³ Inni cindham balih sinlih waanisha, amayimhi idhdhah, atin lel sinni afcaado noh iyfiddina.

Yane Yallih maqhdas care

¹⁴ Aamininnixe maraalih manlaafanina. Xaqqe, uma ciyyoolih ayim kaa geyshishsha? Hido, ifi diteelih ayim yangale?

¹⁵ Masiix, Beliyarlih ayimti ittifaaq leya? Hido, Yaamineti, aamininnixe tiyaalih ayimti gide yangale?

¹⁶ Yallih macbad, asnaamlih ayim kaa tayseene? Nanu Yane Yallahi macbad kino. Yalli tahe yarhxe: “Anu inni sigima ten fanadde abiteyaako ten fanadde gerho kiyo, anu lel ten Yalla akko kiyo, usun lel yi xiyaw yakkoona kinon.

¹⁷ ‘Amaydo, ten fantaako eweca, tenko lel barhsimanta’, yarhxe Maddari, xaraame kinam lel mirhagina; sarrah anu sin kabbaato kiyo,

¹⁸ anu lel sin abba akko kiyo, atin lel yi dhaylo kee yi sayto takkoona kitin”, yarhxe Nabamko Naba Maddari.