2 Korintos 5 - Saaho Cusub Cahde

Carshi ni sigima

¹ Ta tenda kin ni cari udduuniyatya nok dumemko, xiyaw gabah siraaximinnixe care, Yallaako kin makaano umman geeditya, carshelle linom naarhige.

² Ta tendadde angaarishak nane, ninni sigima carshiya sarinno lel hambereerak nane.

³ Sarinnemko lel rummah casiinih nakko makino.

⁴ Ta tendadde nanem fanah, nolle cilishayaako angaarishna. Tayim lel sarinno kibah casiinih nakko farhnah maki. Tayim lel tamaa rabati aniinah yamandhaco ciloh kinni.

⁵ Usuk, taymih ni yisqirribeti, dhishih lel Ufaye noh yoxoyeti, Yalla kinni.

⁶ Amaydo, nanu umman gedda mece fidbehi wannun kino. Nanu carelle nabsedde aninuk, Maddaraako mirix-nerhxeh nane.

⁷ Amayim lel imaanah kibah mabloh migerhnamhi sabbatah kinni.

⁸ Yoo, nanu mece fidbehi wannun kino, ta nabseeko barhsimneh lel carelle Maddaraalih nakkem noh tashshe.

⁹ Amaydo, farheh carelle hido lel mirixtalle ninniyeh, kayya xedenishno kinni naxiggirem.

¹⁰ Nabseelih aninuk abne mecaani yakko umaanih, ummanti ishi casbe kabbaato ciloh, firdi kurse Masiixiyahi nifille namaato nolle tane.

Wagari khidma

¹¹ Amaydo, Maddari mashshi aymottä kinam naarhigeh aki mara ashshimininuk nane. Laakin nanu Yallah mudhdhugaat kino, sin afcaadoh gantah mudhdhugaat nakko cag lino.

¹² Nottah falittoona takale sinah axaynuk nanenkah, gaxneh ninne nayshadhdhago ciloh maki. Tayim lel tamaa afcaadodde tanemih akkekkah, irot mabloh falita maralle akah tadabbiiniikah dhictoona ciloh kinni.

¹³ Nicbidemko Yallah kinni, kaslih ninniyemko lel, sinah kinni.

¹⁴ Nanu Masiix kaxanih gabadde nanemhi sabbatah, inketti umman tiyah rabe, amaydo, inkoh rabeenim naarhige.

¹⁵ Tamaa aniinaalih yane mari, tenah arhxuk rabe tiya kee ugute tiyah kibah, sinneh arhxuk maraanamko, usuk umman tiyah rabe.

¹⁶ Amaydo, kadok sarrah, xazottat araxah walaa inketta minaarhige. Masiix xazottat araxah walaa kaa aarhiginuk nineh nekkemih, kamboh laakin kado amaymih kaa minaarhige.

¹⁷ Amaydo, akkinnanti Masiixidde yinniyemko, cusub makhaaliqho kinni. Tamaa kalxiitim tillabtah cusubam temeeteh tane.

¹⁸ Tayim lel inkoh Yallaako kinni; usuk isheh Masiix araxah abeh nottaalih wagareh, wagari khidma lel noh yoxoye.

¹⁹ Tayim lel Yalli Masiix araxah caalamlih wagara gedda, ten zambe alle miloolaysha, nottalle lel wagari farto nolle yoxoye.

²⁰ Amaydo, Yalli lel ni araxah deecimak yanem balih, nanu Masiix wokola kino. Nanu lel Yallaalih wagartoona Masiix idhdhadde sin dhaacimak nane.

²¹ Nanu ninneh Masiix araxah Yallih xaqqe nakko ciloh, tamaa zambe aarhige waya tiyak usuk isheh zambe akah yakkeekah akko abe.