2 Korintos 4 - Saaho Cusub Cahde

Mece warih ifo

¹ Amaydo, Yallih raxmah ta khidma neellek sarrah, niya micidna.

² Nanu laakin xoola kinam ambulluwe waytaya xabneh nane. Yallih nifille lel amaa rumma umman tiyahi afcaadodde cadimbililih kab-ishnah ninne nayshidhdhigenkah, siixo lem hido Yallih waani taybiddilem abnamko xinneh nane.

³ Tamaa nanu warroyishna mece wari alfiimemko, tamaa alawuk yane maraako kinni alfiimeh yanem.

⁴ Tenim lel, ta caalamti yalli, mece warehi ifo, tamaa Yallih misle kin Yeesus Masiix nabne yabliinimko, aamininnixe marahi xangal alifeh yane.

⁵ Yeesus Masiix Maddara kinam, nanu lel Yeesus idhdhadde sin garuuza kinom kibah, ninni zacabah maki warroyishnam.

⁶ Tamaa: “Ditedde ifi iffoo” yerhxe Yalli, tamaa Yeesus Masiix nifille yumbulluwe Yallih nabnehi irhgat ifo noh yaxaw ciloh, ni afcaadolle ifishe.

Cukra kallat citrodde

⁷ Laakin naba xayli Yallih tiya kibah, ni tiya makinam tamadhdhago ciloh, ta cukra kallat citrorudde lino.

⁸ Nanu umman ummanimih nantseebebe, laakin minalaye; abnam sorhna, laakin niya minagrice;

⁹ haddaanimna, laakin mixinnitimino, namuttukeh radna, laakin minalaye;

¹⁰ Yeesus aniina ni nabsedde tamballaw ciloh, umman gedda Yeesus rabahi xunsus ninni nabsedde naaqhuce.

¹¹ Yeesus aniina ni nabsedde tamballaw ciloh lel, nanu ta aniina-le marak, Yeesusuh arhxuk umman gedda rabih ni asxayik yanin.

¹² Amaydo, rabi nottadde, aniina laakin sinadde ashtuqhuluk tane.

¹³ Tamaa: “Eemene, amaymih lel waanishe” yarhxiinim tunkuttubeh akah taneekah, inki caynah imaan ufaye linomhi sabbatah, nanu lel naamine, amaymih lel waanishna,

¹⁴ tamaa Maddara kin Yeesus uguseti, notta gantah Yeesuslih ni uguso kinam kee sinlih kaa nifille ni baaho kinam naarhige.

¹⁵ Tayim inkoh sin nafaacah kinni, amayim lel nicma akah tamxaye mari ammanguk tammange gedda, Yallahi nabneh gaxta xamde ziyaaddo ciloh kinni.

¹⁶ Amaydo, niya micidna. Ni nabsi irooko baarrowemih, addat ni nabsi maaxi yamaato kinni yacussubem.

¹⁷ Ta sissik urhurh waqhtih ni waaxelti lel, agaagim hin umman geedit cilish nabne noh yaxaw kinni.

¹⁸ Nanu lel tamaa tambulluwemidde akkekkah, ambulluyinnixemidde kinni kulux-narhxem. Amayim lel tamaa tambulluwem tillabtam kinni, ambulluyinnixem laakin umman geediitim kinamhi sabbatah kinni.