2 Korintos 3 - Saaho Cusub Cahde

Cusub cahdih khaddamte

¹ Malammih ni yaysherheerhege mara farhak nane? Hido lel aki xiyaw akah abaanaakah, sinalle hido sinko aysharhaarhagti farto ni farhshishsha?

² Ummanti yaarhago kee yaqhraw ciloh ni afcaadodde tunkuttube ni aysharhaarhagti farto isheh sina kinni.

³ Atin Masiixko farritimte, ni araxah lel gufte, midadah akkekkah, yane Yallahi Ufayeh tunkuttube, dhayitti luxulle akkekkah lel, xiyaw afcaadohi luxulle tunkuttube farto kitin.

⁴ Masiix araxah Yalladde lino imaan tatiya kinni.

⁵ Ummannim nottaako akah tamiite dhic linoh akkekkah, ni dhic akko yamiitem Yalla kinni.

⁶ Yunkuttube sercatah akkekkah Ufayeh yunkuttube cusub cahdehi khaddamte nakko ni dhicshishshem Yalla kinni. Amayim lel yunkuttube sercat yagdife, Ufayi laakin aniina yaxayemhi sabbatah kinni.

⁷ Tamaa sercat farhshiisha khidma dhayitti luxulle tunkuttubeh tine. Ta khidma walaa nabneelih tamaato kibah, rabi katayishshe. Tamaa ahsisuk tine tee nabnehi sabbatah Israa-eel xiyaw Moosat nifidde kulux-yarhxoona taaneenimko,

⁸ amaydo, Ufayi khidma amayimko naba nabne taallo maki?

⁹ Maqhtsacti katayishsha khidma tayidhdhale nabne teellemko, xaqqi khidma amayimko ferta nabne taallo alle tane.

¹⁰ Rummah lel, tamaa erherhih nabne luuk tinem, amayimko naba sarraahit tiyaalih nable gedda, rummaahit nabne luuk mitine.

¹¹ Tamaa bakittam nabneelih temeetemko, umman geediitim amayimko naba nabne taallo kinni.

¹² Nanu ta gina le cag linomhi sabbatah kinni nafdibem.

¹³ Nanu tamaa Israa-eel xiyaw bakitak tine nabneh abayshimadde kulux adde yarhxiinimko nif abbuzuzuk yine Moosa balih makino.

¹⁴ Ten xangul laakin yitrireh yine. Kalxit cahde yaqhriin gedda lel, Masiix araxah bisa fakkittamhi sabbatah, amaa goleeni kaafa fanah akah macrhayinna.

¹⁵ Yoo, kaafa fanah Moosat sercat anqirriinnan gedda, ten afcaado tubbuzuzeh tane.

¹⁶ Laakin akkinnanti Maddaralle gaxemko, amaa bazuze akah tacrhiye.

¹⁷ Kado, Maddari Ufaye kinni, Maddari Ufayi alle yanelle lel, finja tane.

¹⁸ Nanu lel inkoh, abbuzuzinnixe niflih, Maddari nabne magannaxit balih ziffoyshak, kaa mislih xibar akah naalleekah, nabneeko nabnelle nambaddalo kino. Tayim lel Ufaye kin Maddaraako tamiitem kinamhi sabbatah kinni.