2 Korintos 2 - Saaho Cusub Cahde

¹ Amaydo, yi mumut sin xazzanoyshamko malammih sinalle amiitemko abaysheh aniyo.

² Anu sin xazzanoyshemko yi sabbatah xazzanoye tiyaako bextih, miyatto kinni yi xedenishati?

³ Tayim sinalle uktubem, amiite gedda tamaa xeden akko geyo missil maraako, xazan geyamko ciloh kinni. Amayim lel yi xeden umbuka sinhi xeden kinam taarhigiinimih thummut-ekkemhi sabbatah kinni.

⁴ Mango tsabaaba kee afcaadot qadablih, amayim balih mango dhiimoolih sinalle uktubem, sinah liyo mango kaxano taarhagoona ciloh kibah, sin xazzanoysho ciloh maki.

Zambi-wannalle alle xabanta

⁵ Akkinnan tiya xazzanoysheti yinniyemko, yotta bisa makiiki, ishi qiyaasalle, aymanguk anniye wayemko, umman sina gantah kinni xazzanoyshem.

⁶ Amah higgidin tiya, mango marahi maqhtsacti kaa dhicta.

⁷ Amaydo kado, usuk sirii xazanadde yamundhucemko, atin alle xabteenih kaa aydukumusanta.

⁸ Amaydo, atin kaa kixintiinim kaa tayshadhdhagoona sinalle amaanatisha.

⁹ Tayim sinalle aktubiyuk anem, sin acakkano kee ummanim sinak arhxeya yaabbe mara kitiinim sinak aarhago ciloh kinni.

¹⁰ Atin alle xabinnan tiyalle anu gantah alle xaba. Rummah, anu alle xabem, alle xabem tinniyemko, Masiix nifille sinah arhxiyuk kinni.

¹¹ Tayim lel, Sheethan siixi ayim kinam naarhigemhi sabbatah, kaa doolab sorhnamko ciloh kinni.

Sariigalla Masiixidde

¹² Masiix mece ware warroysho Tirooyasalle emeete gedda, Maddari ciyyoh caraf fakkiteh walaa yoh sugoo kibah,

¹³ Tiitos yi sacal amalle migeyinniyomhi sabbatah, ufayi curfen migeyinniyo. Amaymih tenak mecaanille erhxeyaako Makedooniya fanah edee.

¹⁴ Masiix araxah umman gedda kaamil kin sariigallalle ni santishah, ni araxah lel Masiix yamadhdhago kaa irhgahi mece certa ummanille faax-isha Yallah xamde takkoo.

¹⁵ Nanu tamaa gargeerime mara kee alawuk yane marahi addadde Yallih nifille Masiix mece certa kino.

¹⁶ Garoh rabaako raballe tillaabisha ure, garoh lel aniinaako aniinalle tillaabisha ure kino. Taymih abto dhictam miya kinni?

¹⁷ Yallaako farritime mara nekkeyaako, ninni mece niyah, Yallih nifille Masiix araxah waanishak nanenkah, tamaa mango mara balih, Yallih waani sinni nafaacah yaybiddile mara makino.