2 Korintos 13 - Saaho Cusub Cahde

Abayshimat asuuso

¹ Anu maddaxit gedda kinni sinalle amiitiyuk anem. Akkinnan gondo lel lamma hido adooxa shaahid-hi seththeeh dhishshimto alle tane.

² Tamaa basoh zambe abe mara kee inkoh aki xiyaw, malammih sinalle emeete gedda ten asuuseh iniyo. Kado lel dherhille ekkeh ten asuusak aniyo. Taymik sarrah emeetemko lel walaa inketta akko xabo makiyo.

³ Tayim lel Masiix yi araxah waanishak yanemhi daliil fadhdhaanamhi sabbatah kinni. Usuk sin fanadde xayla le tiya kibah, rukut tiya maki.

⁴ Usuk ruktah masqalakke takarime, Yallih xaylah laakin mara. Nanu kayyadde rukut mara kino, sinlih abnamah laakin Yallih xaylah kaalih marno kino.

⁵ Atin imaan litiinim kee sinne icikkina. Sinne imirmira. Hido Yeesus Masiix sinadde yanem atin sinneh mitaarhigiini? Akke wayemko rummah cakanalle raddeenih tanin!

⁶ Nanu cakanalle miraacinom taarhagoona cag liyo.

⁷ Atin umaani abtaanamko lel Yalla dhaacimna. Amayim lel nanu amaa cakanalle raace marah walaa nimmingidemih, atin xaqqe kinam abtoona ciloh kibah nanu cakanalle racnemih maki.

⁸ Nanu rummah kibah, rummaati diddeh walaa inkim abno mirhicna.

⁹ Nanu rukut mara, atin lel birthic mara kitiinimih xedeneenit kino. Nanu dhaaco akah abnam lel atin mece agalguluh yucussube mara takkiinim kinni.

¹⁰ Tayimhi sababah: Maddari yoh yoxoyeh yane reeza akah carisho kibah akah dumuso makinamhi sabbatah, amiite gedda inni reeza etneefeceh sinalle aytiriremko kinni, sinko mirixtah aniyuk tayim sinalle aktubiyuk anem.

Abayshimat salaamta

¹¹ Abayshimalle, yi saculo, xedenanta. Mece agalguluh yucussube mara takkoona ixiggira, sittiya aydukumusanta, sittiyaalih emseeneya, maaxiyodde maranta, kaxano kee maaxiyoh Yalli lel sinlih yakkoo.

¹² Tinqiddise fugtoh sittiyak salaam-erhexa.

¹³ Yinqiddise mari inkoh salaamat sinak yarhxin.

¹⁴ Maddara kin Yeesus Masiix nicma kee Yallih kaxano, amayim balih Quddus kin Ufayehi agle sinlih takkoo.