2 Korintos 11 - Saaho Cusub Cahde

Zirabti katattaynit

¹ Dagum duudiinot waanih sinlih waanisho yolle curtaanam farhe dhaarhe. Yolle curanta!

² Anu Yallih ashshiinoh sinah ashshiinamhi sabbatah, thaahira kin dhaggitinnixe barhä balih Masiixih sin axawo inki xiyawtoh sin iliisheh aniyo.

³ Tamaa caroora ishi siixoh Xaawa akah doolabteekah, atin gantah sin xisaab, tamaa Masiixih litin cado-qalbe kee lillaako sin yashshixitemko sinah mashshiita.

⁴ Akkinnanti yemeeteh tamaa nanu warroyishne Yeesusko beexin tiya warroyshemko, hido lel tamaa atin kabbatten ufayeko beexin ufaye kabbatteenimko, hido lel tamaa kabbatten mece wareeko beexin mece ware kabbatteenimko, sik-terhxiinih kabbaatak tanin macna kinni.

⁵ Rummah, anu tamaa naba fartottitko gaxam inne makkale.

⁶ Waanit dhic aalle wayemih, irhgat wayto maliyo; rummah, tayim ummanimidde umman ginah sinah caddoyishneh nane.

⁷ Hido, atin xaf-tarhxoona ciloh, inne uscundhuweh, Yallih mece ware amaa ginah sinah warroyshemhi sabbatah, zambe abeh aniyo?

⁸ Sina akhdamo ciloh, aki kanaayisko masaariif kabbaateyaako ten baysheh aniyo.

⁹ Sinlih iniyoh, yi farhshishsham luuk iniyo gedda gantah, tamaa Makedooniyaako temeete sacul yi farhshishsham yoh yoxoynimhi sabbatah, walaa inkettalle cuuka makkiyo. Amaymih, farhinnan ginah cuuka sinalle akkemko inne ibbirhe, tayek sarrah lel amayim abo kiyo.

¹⁰ Ta yottadde yane Masiix rummah yok takkoo, yi falo Akhaayaati zoobälle daw-tarhxo makinam.

¹¹ Aymih? Sin mikixiniyomhi sabbataha? Sin kixiniyom Yalli yaarhige!

¹² Tamaa akah falitaanamah, nottaalih lem yakkoona wagiya mari caashir wayoona ciloh, ta abak aniyom abaanam katattaysho kiyo.

¹³ Ta gina-le mari, Masiix fartottit kinoonimih sinne yaymingidiinih, doolab shaqqaala, zirabti fartottit kinon.

¹⁴ Sheethan gantah ifi malaykattoh ishe yaymingidenkah, tayim cibra maki.

¹⁵ Amaydo, kaa khaddamte gantah xaqqi khaddamteh sinne yiymingidiinimko, tayim cibra maki. Ten abayshima lel ten abittot balih takko kinni.

Fartotta kin Bawlos waaxelta

¹⁶ Gabbaacak aniyo, walaa inketti duuda yi yakkalo kaalle mitane. Atin gantah duuda yi tekkeliinimko, anu lel dagum falito ciloh, duuda balih yi ubula.

¹⁷ Anu taginah faloolih afdibeh waanisham, duuda balih kibah, Yalli akah waanishe dhaarheekah maki.

¹⁸ Mango mari xazottat araxah faliteenik sarrah, anu gantah falito kiyo.

¹⁹ Atin sinneh kas-le mara sinne takkaliinimhi sabbatah, tamaa duudit kin mara xedenlih curteenih tanin!

²⁰ Rummah lel, wuliti garuuza sinak aba, hido sin caggaboysha, hido sinadde yambillitse, hido sinalle yamnanabbe, hido dhaban sinak tsafuca hanuk, kaa curtan.

²¹ Tayim yi xoolayishsham kinni hanuk, nanu ta gina lemille daraaga kuuk ninem balih sinah warisho yolle tane! Akkinnanti falito dhiicaya yinniyemko laakin, — duuda balih waanisho kiyo — anu gantah falito kiyo.

²² Usun Cibriyaati xiyaw kinooni? Anu gantah kiyo. Usun Israa-eel xiyaw kinooni? Anu gantah kiyo. Usun Abraahim zara kinooni? Anu gantah kiyo.

²³ Usun Masiix khaddamte kinooni? Jabda balih waanishak aniyoh kibah, anu tenko ziyaada kiyo. Tenko ziyaada xawaleh, mangole gedda umudhdhuweh, mangole gedda sirii ginah umuttukeh, mangole gedda lel rabit af gufe tiya kiyo.

²⁴ Koona gedda, Yahuuduh marootomko inketta hinam khormaajah sabciime.

²⁵ Adooxa gedda iloh umuttuke. Inki gedda dhayitih umuttuke. Anu adde aniyo doonik adooxa gedda tiggidile; bar kee lellec badti bukalle selel-erhxe.

²⁶ Mangole gedda kallaaxelle iniyo, weecaako, garaacenko, yi xiyawko, Aki-maraako, daafolle, zibolle, badalle, zirabti saculko gidcatadde iniyo.

²⁷ Ciyyo kee xawalah, bar dhinta hinnim, safra kee bakharah, cululudde, gallaco kee casiinih iniyo.

²⁸ Akimko ziyaadah lel, maaxi yamaato inkoh amaa kanaayisih shaqhlat cuuka luuk iniyo.

²⁹ Rukutti miyatto kinni, kaa rukta yodde assaabbe waytemko? Miyatto kinni zambedde radeh, anu akah axurtume wayeti?

³⁰ Falito ekkemko, rukut tiya alle kiyomuh falito kiyo.

³¹ Maddara kin Yeesus Yalla kee Abba, umman gedda baraka-le, anu zirabbitak maaniyom lel usuk yaarhige.

³² Dimaashqalle, tamaa nugus Aretasti geridde masxadaadara kuuk yine reezanti, yi yabbarho Dimaashqaati daafo dhawrhak yine.

³³ Anu laakin amaa qaanadde tine sinistiraako naba jambiilidde yi ulluseenih kaa gabaako assaaco dhiice.