2 Korintos 10 - Saaho Cusub Cahde

Bawlos ishi khidmah abe deeso

¹ Anu, Bawlos, sin nifille amnonobba hin tiya, sinko akuula lel tirir tiya yi yakkale marak, inneh Masiix mecaani kee naxrurtah sin dhaacimak aniyo.

² Sinalle amiite gedda, fidbeelih tiririk akah waanishaakah yok abtaanamko sin dhaacimak aniyo. Tamaa udduuniyat araxah marnam ni yakkale maralle laakin, tiririk alle adabbo dhiica.

³ Udduuniyat araxah walaa marno kibah, udduuniyat araxah dhiba maabna.

⁴ Ni dhibahi aslaxa lel udduuniyaatim akkekkah, dhacuma difaac akah dumusna Yallih xayla lino.

⁵ Taginah lel, Yallahi irhgah didde kin zirabti mablol kee umman amnonobba dumusna. Umman xasaab lel nabbirheh Masiixih akah yam-izzizeekah akko abna.

⁶ Sin am-azzaz kaamil yakke gedda, tamaa inkoh am-izzizinnixe mara naqhtsaco ninqirribeh nane.

⁷ Atin irooko bisa ablii tanin. Akkinnanti Masiix tiya kinamah ishe yeemenemko, usuk akah kinniikah nanu gantah Masiix mara kinom yaarhago kaalle tane.

⁸ Tamaa Maddari sin dumusnanah akkekkah sin carsah noh yoxoye reeza, amayimko dagum ziyaadisheh falitemko gantah, akah xoolashshiito makiyo.

⁹ Inni jawawubuh abeh sin mashshiisho farhem makkalina.

¹⁰ Amayim lel, xiyawko gari: “Kaa jawawub cilisham kee siriyam kinni, kaa table gedda laakin rukut tiya kinni; kaa waani lel makko male” yarhxiinimhi sabbatah kinni.

¹¹ Tamaa gina-le mari lel nanu jawaaballe zibodde aninuk narhxem, nanniye gedda abnam kinam yaarhagoonaa.

¹² Tamaa sinneh sinne yaysherheerhege maraalih ninne hayno hido agaagishno minadbile. Usun sinne-sinneh sittiya yaqheesiinih sittiyaalih sinne agaagishan gedda, usun fahme hin mara kinon.

¹³ Nanu laakin, sina gantah gufnandah, tamaa Yalli isheh noh yoxoye ciyyoh wakalelle kibah, amayimko foorolle falinno makino.

¹⁴ Sina walaa gufe waye mara balih, ninni qiyaasko foorolle falitak minanino. Rummah lel afti gabolle Masiix mece ware bahteh sinalle temeetem notta kinni.

¹⁵ Nanu ninni ciyyoh wakaleeko foorolle, aki mari adde xawalen khidmah mifalinna. Ni cag yekkemko, sin imaan akah anabuk yaneekah, noh yomxoye ciyyoh wakali sin fanadde nabaatih yafiddinem kinni.

¹⁶ Amayim lel, aki marahi geridde tekke ciyyolle falitekkah, sinko tillabneh, aki baarholle mece ware warroyishno ciloh kinni.

¹⁷ “Falitinnanti Maddarah falitoo” yarhxiinim tane.

¹⁸ Maddari yaysherheerhege tiya kinni kabbat geyati kibah, isheh ishe yayshidhdhige tiya maki.