2 Korintos 1 - Saaho Cusub Cahde

Salaamta

¹ Yallih farhih Masiix kin Yeesus hi fartotta yekke Bawlos kee ni sacal Timoteyosko, tamaa Korintosulle geytimta Yallih kaniisa kee, umbuka Akhaayalle geytima yinqiddise marah tadiye farto kinni.

² Ni Abba kin Yalla kee Maddara kin Yeesus Masiixko nicma kee maaxiyo sinlih takkoo.

Umbuka ruftoh Yalla

³ Ni Maddara kin Yeesus Masiix Yalla kee Abbah fayla takkoo. Usuk naxrurtat Abba kee umbuka ruftoh Yalla kinni.

⁴ Nanu ninneh Yallaako geyne ruftoh tamaa yentseebebe marah inkoh rufto akah naxayekah ni dhicshiisho ciloh, inkoh ni tsabaabadde rufto noh taxayem kayya kinni.

⁵ Nanu Masiix waaxelta mangaalih akah nangaleekah, Masiix araxah lel rufto gantah mangaalih nangale.

⁶ Nanu nentseebebeh ninniyemko, sin rufto kee gargerih kinni; nanu rufto geynemko lel sin ruftoh kinni. Tamaa nanu waaxelsinna waaxelta lel sabreelih curtan.

⁷ Ni waaxelta nottaalih akah tengeliiniikah, ni rufto gantah tangaloona kitiinim naarhigemhi sabbatah, tamaa sinadde lino cag yisbite tiya kinni.

⁸ Ni saculo, Aasiyalle geyne tsabaaba sodhdhaanam sinak mifarhna. Ni dhicko aganalle cuuka nolle tekkemhi sabbatah ninni aniinaako nicdireh nine.

⁹ Rummah lel rabit firde kabbatnemih nodde yimmingideh yine. Tayim laakin ninnedde akkekkah tamaa rabe mara ugusa Yalladde cikkishinno ciloh tekkem kinni.

¹⁰ Usuk rabi xiyaa gudduusa gidcatko ni yeyyeece, ni yayyaaco lel kinni. Taymik sarrah ni yayyaaco kinamah lel kayyadde cag lino.

¹¹ Atin lel dhaacoh ni xattoona sinalle tane; amayim lel mango marahi dhaacoh geyna barakah lel mango mari ni idhdhadde Yalla xamdishitoona kinon.

Bawlos xagara tanqiyyire

¹² Nanu akah cafadnam tayim kinni: ta caalamalle fertoh lel sinlih lino kabkabbot yinqiddise araxah kee Yallaako geytima cado-qalbeh kuuk yinem, ni afcaadohi dhaw nolle yashhide. Tayim lel xiyaw xikmah akkekkah, Yallih nicmah abnemhi sabbatah kinni.

^13-14 Atin tiqhriinim kee taarhigiinim kibah akim sinalle aktubinuk minane. Tamaa kado dagum akah nok taarhigiiniikah, niiroh kaamilik tafhamoona cag liyo. Ni Maddara kin Yeesus lellec lel ni zacabah cafaddoona kitin, nanu lel sin zacabah cafadno kino.

¹⁵ Taymih thummut kuuk inemhi sabbatah, malammit gedda barkat kabbattoona ciloh ookomeh sinalle amaato farhe.

¹⁶ Makedooniya aduuk sinalle emeeteh, Makedooniyaako gaxak lel sinadde icrhiyeh, Yahuudiya fanah aduuk yi sukuukuytoona sinak farhe.

¹⁷ Tayim abo farhe gedda thab-arhxo taaneh kinniho? Xagara aba gedda, inki geddadde: “Yoo, yoo” kee “Maale, maale” yarhxeyaako xiyaw farhih yadiye tiya kiyoh kinniho?

¹⁸ Yalli umun akah kinniikah, nanu sinah warishne ni waanitta “Yoo” kee “Maale” kuuk mitine.

¹⁹ Tamaa, yotta, Silas kee Timoteyos sinah warroyishne Yallih Barha kin Yeesus Masiixim “Yoo” kee “Maale” kuuk miyine, laakin kaayim umman gedda “Yoo” kuuk yine.

²⁰ Yalli wacde akah sayem inkoh kaa araxah kinni “Yoo” takkem. Amaymih kinni lel kaa araxah Yallih nabnek “Amin” narhxem.

²¹ Notta Masiix araxah sinlih ni yayrhibbisheti Yalla kinni, ni dooreh lel ni yuskuteh yane.

²² Ishi maxtam nolle hayeyaako, carbuunuh ishi Ufaye ni afcaadodde hayeti lel kayya kinni.

²³ Korintos fanah sinalle akah amiite wayem, sin zeeloh kinamah Yalli yolle yashhide.

²⁴ Sinni imaanadde tisbitiinih taniinimhi sabbatah, atin xedentoona sinlih nashtuqhule kibah, sin imaanalle maddarit nakko maki.