2 Bithroos 3 - Saaho Cusub Cahde

Maddari lellec yamaato kinni

¹ Yi kaxantoolito, ta kado sinalle aktubiyuk anem malammit jawaab kinni. Ta lamma jawaabadde lel xunsusuh rummaahit sin niya kinni uguugusak aniyom.

² Amayim lel, tamaa tinqiddise nobowa takko kinam warisheenih yiniinim kee sin fartottitti araxah kabbatten Maddara kee Gargeereeni amre xunsussoona sinalle tanemhi sabbatah kinni.

³ Abayshimat lelleecadde, sinni uma farhi katattaak, tsaggarowa mari tsaggarowak yamaatoona kinoonim, ummanimko basolle tayim irhiga.

⁴ Usun: “Kaa mumut hi wacdi awla yane? Tamaa makhaaliqhot erherhko, ni abbub adde raben lellec dhagan ummannim amaa ginah kinni aduuk tanem” yarhxoona kinon.

⁵ Carshi dherh muddaako yinem kee baarho Yallih waanittahi araxah layeko layet araxah tunkhulluqhem macal kee magoh biyashshiitan.

⁶ Tayimhi araxah lel amaa geddadde tine caalam layeh weecitteh telee.

⁷ Laakin tamaa kado yane caran kee baarho firdi lellec kee tamaa Yallih mashshi hin mari yalaynindah, amaa waanittah dhawrhumeenih girah yinqirribiinih yanin.

⁸ Laakin yi kaxantoolito, Maddaralle inki lellec shiix iggidiya balih, shiix iggidiya lel inki lellec balih kinam, tatiyä mibiyashshiitina.

⁹ Maddari ummanti yataabo kibah, walaa inketti yalaw mifarhamhi sabbatah, sinah arhxuk asbiruk yanenkah, tamaa garodde caawitemih akah higgidaakah, tamaa ishi wacde yaskimiliinim caawisho maki.

¹⁰ Maddari lellec laakin garceena balih yamaato kinni. Amaymik sarrah, caran goroxak tillaabo kinni, carantim lel xarareyaako dalalo kinni, baarho kee baarholle tekke ciyyo xararto kinni.

^11-12 Tayim taginah talawo tekkek sarrah, aaginale xiyaw kinni takkoona sinalle tanem? Tamaa Yalli adde yamiite lellec ilaalak kee afishak, tinqiddise aniina kee Yallih mashshiilih kinni martoona sinalle tanem. Amayim lel amaa lellec caran xarareyaako yalaw kee carantim bolah dalalo kinamhi sabbatah kinni.

¹³ Tamaa kaa wacde balih laakin, cusub caran kee cusub baarho xaqqi adde sigaya ilaalak nane.

Abayshimat waani

¹⁴ Amaydo, yi kaxantoolito, tayim ilaalak tinniinik sarrah, caybe hido xoola hinnim kayyah maaxiyodde akah sugtaanaakah xawalanta.

¹⁵ Ni Maddari sin gargeero abak yane sabre exeesebanta, ni kaxantoole kin Bawlos gantah, tamaa akah tomxoye xikmah tayimhi zacabah kinni sinalle yuktubeh yinem.

¹⁶ Usuk ta gondohi zacabah waanisha gedda, ishi jawawubudde inkoh tayim kinni abam. Amadde yafhamoona siriyamko wulim tane. Tamaa sorheenit kee asbitinnixe mari lel tamaa aki Kutuub akah ishaanaakah, sinni liyah amayim sawalak yanin.

¹⁷ Atin amaydo yi kaxantoolito, tayim tookomiinih teerheginyaako, tamaa sercat hin marahi amlolokkah duffumteenih sinni isbaat waytanki selitanta.

¹⁸ Laakin ni Maddara kee Gargeereena kin Yeesus Masiix nicma kee irhgadde carsimanta. Kayyah lel kado kee umman geddah nabne takkoo. Amin.