2 Bithroos 1 - Saaho Cusub Cahde

Salaamta

¹ Yeesus Masiix garuzza kee fartotta kin Simcoon Bithroosko, tamaa Yalla kee Gargeereena kin Yeesus Masiix xaqqehi araxah nottaalih lem kin imaan kabbaate mara fanah:

² Yalla kee ni Maddara kin Yeesus araxah litin irhgah nicma kee maaxiyo sinah sasantoo.

Yallih deeco kee dooro

³ Yallih xayli, inkoh aniinah kee Yallih mashshih ni farhshishsham noh yoxoyeh yane. Tayim lel kaa zacabah lino irhgahi araxah, ishi nabne kee mecaanille noh deecimeh yane.

⁴ Amayimhi araxah lel, naba limo le naba wacde noh yoxoyeh yane. Tamaa uma farhih sabbatah yamiite caalamalle yane masxeeko kuddeenih, Yallih thabiica kaalih yangale mara tekkiinim lel tayehi araxah kinni.

⁵ Tayimhi sabbatah lel, sinni imaan mecaaniilih, mecaaniilih lel irhga,

⁶ irhgaalih lel sinne-yabbirhiinim, sinne-yabbirhiinimlih lel sabre yaalliinim, sabreelih lel Yallih mashshi yaalliinim,

⁷ Yallih mashshiilih lel sacoolinni mecaani yaalliinim, sacoolinni mecaaniilih lel kaxano yaalliinim ziyaadishshoona ciloh sinnelle tanem abanta.

⁸ Tayim sin asliino tekkeh ziyaadak lel tinniyemko, Maddara kin Yeesus Masiix irhgadde xaraka hin mara hido fire hin mara takkiinimko sin dhawudhdha.

⁹ Ta asliino aallinnixeti lel dherhille ablinnixe inti-male kinni. Tamaa basoohit ishi zambeeko yimtsitstsiyem lel biyashshiite tiya kinni.

¹⁰ Amaydo, yi saculo, sinni deeco kee dooro taysabatoona xawalanta. Tayim abteenimko lel caduruh andafittoona makitiini.

¹¹ Taginah lel tamaa ni Maddara kee Gargeereena kin Yeesus Masiix nigsinna umman geedityadde orobaanam, xindaalih sinah tamxawo kinni.

¹² Amaydo, atin sinneh taarhigiinih, tamaa kado litin rummadde lel dhishshimteenih tanin hanuk, umman gedda ta asliino sin xunsuuso kiyo.

¹³ Ta nabsi yodde yanem fanah, sin xunsuusak sin uguuguso xaqqeh yolle higgida.

¹⁴ Tamaa ni Maddara kin Yeesus Masiix akah yoh caddoysheekah, ta nabse xabeh adde adiye waqhti kab-yerhxeh yanem aarhige.

¹⁵ Anu sin xabeh adiyek sarrah, tayim umman gedda xunsussoona ciloh, yolle tanem inkoh abo kiyo.

Masiix nabne kee Nobowat waanitta

¹⁶ Ni Maddara kin Yeesus Masiix xayla kee kaa mumut hi zacabah sinah warishne gedda, xiyaw siixoh cijaajen tinem-tine katayneh akkekkah, tamaa ninneh nuble kaa nabintahi shohoda kinomhi sabbatah kinni.

¹⁷ Tamaa: “Tati yinkixxine yi Barha kinni. Anu kaalih xedeneena kiyo” yarhxe dhaw tamaa naba nabneeko alle yemeete gedda, Abba kin Yallaako xishma kee nabinta le nabne kabbaate.

¹⁸ Tamaa tinqiddise koomalle kaalih ninemhi sabbatah, ta dhaw carsheeko yemeete gedda nanu ninneh noobbe.

¹⁹ Tayim ziyaada meceetih noh taysibite nobowat waanitta lino. Baarho maxtam fanah, maaxi xutukti lel sin afcaadodde yawcendah, ta waanitta tamaa ditedde ifisha ifo balih macalsitteenimko mecem abak tanin.

²⁰ Ummanimko basolle, tamaa Kutuubudde tane nobowat waani, ten tarjamaako tamiitem makinam taarhigin.

²¹ Nobowat waani Quddus kin Ufayeh santishimeenih, xiyaw Yallaako waanisheenim kibah, caduruh xiyaw farhih temeetem maki.