1 YOHANNIS 5 - Saaho Cusub Cahde

Caalamko yamlikiinim

¹ Yeesus, Masiix kinam aamininnanti, Yallaako yoobokeh yane. Abba akxininnanti lel kaako yoobokeh yane tiya gantah yakxine.

² Taginah Yalla nakxineh kaa amre abna gedda, Yallih cindham kixininom naarhige.

³ Tay kinnih Yallih kaxani: kaa amre dhawurhnam. Kaa amri lel micilisha.

⁴ Yallaako yoobokeh anniinnanti, caalamko yamlikemhi sabbatah; amaa caalamko yamlike nasri lel tatiya kinni: ni imaan.

⁵ Yeesus Yallih Barha kinamah yaamine tiyaako bextih, miyatto kinni caalamko yamliketi?

Yallih Barhih sabbatah yashhidiinim

⁶ Laye kee biiloh Yemeeteti tatiya kinni: Yeesus Masiix. Amaa layeh bisa maki, laakin amaa layeh kee amaa biiloh [yemeete]. Quddus kin Ufayi amaa rumma kinamhi sabbatah, amaa Ufayi lel yashhide tiya kinni.

⁷ Tashhidem adox kinon:

⁸ Amaa Ufaye, laye kee biilo, ta adox lel inketta kinon.

⁹ Xiyaw shahaada kabbatnemko, Yallih shahaada amayimko naba. Yalli ishi Barhih zacabah yoxoye shahaada tatiyä kinni.

¹⁰ Yallih Barhah yaamineti, shahaada ishedde le. Yallah aamine wayati, Yalli ishi Barhi zacabah yishhideh yane shahaadah yeemeneh miyanemhi sabbatah, kayyak zirable abeh yane.

¹¹ Shahaada lel tatiyä kinni: Yalli umman geedit aniina noh yoxoye. Ta aniina lel kaa Barhadde tane.

¹² Ta Barha leti ta aniina le; Yallih Barha aalle wayati, ta aniina male.

Taarhagoona ciloh

¹³ Yallih Barhih migacalle yaamine marak, umman geedit aniina litiinim taarhagoona ciloh tayim sinalle uktube.

¹⁴ Kaa wajhelle lino fidbi lel tatiya kinni: kaa farhih akkinnan xaaja dhaaciminnemko ni yaabbe.

¹⁵ Dhaacimitinnanimih ni yaabbem neerhegemko lel, kaako dhaacimneh nanem linom naarhige.

¹⁶ Akkinnanti, kaa sacal raba fan santishinnexe zambe abak yublemko, usuk akah esseroo, usuk lel raba fan santishinnexe zambe abatiyah Yalli aniina akah yaxaw kinni. Raba fan santisha zambi yane; tayimhi zacabah dhaacimoo maarhxe.

¹⁷ Umbuka uma abitto zambe kinni, raba fan santishinnexe zambi lel yane.

¹⁸ Yallaako yoobokeh yanetii, zambe maabam naarhige. Laakin Yallaako yoobokeh yane tiya, usuk kaa dhawrha, umati lel kaa dhafo mirhiica.

¹⁹ Nanu Yallaako kinom naarhige, umbuka caalam lel umatiih [xaylahi] galedde carhah-gaxteh tane.

²⁰ Yallih Barhi yemeeteh yanem, rumma kin tiya naarhago ciloh fahme noh yoxoyeh yanem naarhige. Nanu lel rumma kin tiyadde, kaa Barha Yeesus Masiixidde nane. Tati amaa rummaahit Yalla kee umman geedit aniina kinni.

²¹ Cindha cindhaamo, asnaamko sinne ixfiza.