1 YOHANNIS 4 - Saaho Cusub Cahde

Ufaye imirmira

¹ Yi kaxantoolito, umman ufaye maamanina, laakin Yallaako kinam kee makinam ufaye imirmira. Amayim lel mango zirabti nobowa caalamalle ifaareenih yaniinimhi sabbatah kinni.

² Taginah lel Yallahi Ufaye taarhigin: umman ufayi Yeesus Masiix nabse yekkeh yemeetem aaliminnaniya, Yallaako kinni.

³ Laakin umman ufayi Yeesusuh aaliminnexeya, Yallaako maki. Tati lel masiix-didde kin [ufaye] kinni. Too yamaato kinam toobbiinih tinin, kado lel meceegeddah caalamalle yane.

⁴ Cindha cindhaamo, atin Yallaako kitin, tena lel timlikiinih tanin. Sinadde Yanetii caalamadde yane tiyaako nabamhi sabbatah kinni.

⁵ Usun caalamko kinon, amaydo caalamti waanih waanishan, caalam lel ten taabbe.

⁶ Nanu Yallaako kino, Yalla yaarhigeti ni yaabbe, Yallaako akkinnexeti laakin ni miyaabbe. Tayimko lel rummaahit ufaye kee doolab ufaye naarhige.

Yalli kaxano kinni

⁷ Yi kaxantoolito, sitta nakxanoo, kaxani Yallaako kinamhi sabbatah, akxininnanti lel Yallaako yoobokeh yane, Yalla lel yaarhige.

⁸ Yalli kaxano kinamhi sabbatah, akxinewaati, Yalla maarhago.

⁹ Taginah Yallih kaxani noh yimidhdhige: Yalli inki ishi Barha caalamalle fareh yanem, kayyah marno ciloh kinni.

¹⁰ Tadde kinni kaxani yanem: nanu Yalla nikxineh nanem maki, laakin usuk ni yikxine. Ishi Barha lel ni zambit hi beezzah fare.

¹¹ Yi kaxantoolito, Yalli tayidhdha ni yikxinek sarrah, nanu sitta nakxano nolle tane.

¹² Yalla yubleti inkinnah miyane. Sitta nikxinemko Yalli nottadde siga. Kaa kaxani lel nottadde yikmileh yane.

¹³ Taginah nanu kayyadde usuk lel nottadde sigam naarhige: usuk noh yoxoyeh yane ishi Ufayehi sabbatah kinni.

¹⁴ Nanu lel Abba Barha caalamti Gargeereena yakko fareh yanem, nubleh nanem lel nashhide.

¹⁵ Yeesus Yallih Barha kinamah aaliminnanti, Yalli kayyadde usuk lel Yalladde siga.

¹⁶ Nanu lel Yalli nottah le kaxano neerhegeh neemeneh nane. Yalli kaxano kinni. Kaxanodde sugati, Yalladde siga, Yalli lel kayyadde siga.

¹⁷ Taginah kaxani nottaalih yikmileh yanem, firdi max fidbe naallo ciloh kinni. Ta caalamalle nanu gantah usuk akah kinniika balih kino.

¹⁸ Kaxanodde gilix miyane, gilix qitscatlih kinamhi sabbatah, laakin yikmile kaxani gilix irolle cida. Gilixati, kaxanodde yikmileh miyane.

¹⁹ Usuk erherhih ni yikxinemhi sabbatah nanu kixinino.

²⁰ Akkinnanti “Anu Yalla kixiniyo” yerhxemko, ishi sacal lel yincibemko, usuk zirable kinni. Yubleh yane ishi sacal akxine wayemhi sabbatah, Yalla yubleh miyaneya yakxano mirhiica.

²¹ Nanu kaako lino amri tatiya kinni: Yalla yakxineti ishi sacal yakkeedo yakxanoo.