1 YOHANNIS 3 - Saaho Cusub Cahde

¹ Yallahi cindham nekkeh decsimnemhi sabbatah, Abba aaginale kaxano noh yoxoyeh yaneya ubula! Kinom kinni lel! Kaa maarhaginnamhi sabbatah, amaydo lel caalam ni mitaarhige.

² Yi kaxantoolito, kado Yallahi cindham kino, ayim nakko kinom lel kazzik maamadhdhago. Usuk yambulluwe gedda, akah kinniikah kaa nablo kinomhi sabbatah, kaa balih nakko kinom naarhige.

³ Kayyadde cag aallinnanti, tamaa Usuk thaahir akah kinniika balih ishe yaythihire.

⁴ Zambe lemidde asinnanti, gantah sercat-maliino aba; zambi lel sercat-maliino kinni.

⁵ Usuk zambit kalo ciloh yimidhdhigem lel taarhigin, kayyadde lel zambi miyane.

⁶ Kayyadde siginnanti, zambe maaba; zambe abinnanti, kaa maballinna walaa kaa miyaarhige.

⁷ Cindha cindhaamo, walaa inketti sin doolabe wayoo. Xaqqe abati, usuk xaqqi-wanna akah kinniika balih xaqqi-wanna kinni.

⁸ Zambe lemidde asak yanetii, ibliisko kinni, ibliis erherhko zambe abatiya kinamhi sabbatah kinni. Tayimhi sabab lel Yallahi Barhi yimidhdhigem, ibliis ciyyo dumuso ciloh kinni.

⁹ Yallaako yoobokeh anniinnanti, kaa zari kayyadde sigamhi sabbatah zambedde maasa. Yallaako yoobokeh yanemhi sabbatah lel zambe abo mirhiica.

¹⁰ Taginah kinni lel Yallahi cindham kee ibliis cindham yamidhdhigiinim. Xaqqe abe waya tiya kee ishi sacal akxinuk anniye waya tiya, Yallaako maki.

Sittiya ikxina

¹¹ Ta “sittiya nakxanoo” tarhxe farto kinni tamaa erherhko toobbiinim.

¹² Ishi sacal yurxude uma tiyaako kin Qaayin balih maki. Ayimhi idhdhadde kaa yurxude? Kaa ciyyo umaani kuuk tine, kaa sacalhim laakin xaqqe kuuk tinemhi sabbatah kinni.

¹³ Saculo, caalam sin tincibemko mibexsiitina.

¹⁴ Sacul kixinnomhi sabbatah rabaako aniinalle tillabnem naarhige. Akxinuk anniye wayati ditedde siga.

¹⁵ Ishi sacal ancibinnanti, nabsi-wanna kinni. Nabsi-wanna akkinnanti lel umman geedit aniina kayyadde sigak taneya malem taarhigin.

¹⁶ Usuk ishi rooxe nottah ayyuk tillaabishemhi sabbatah, kaxano lel taginah neerhegeh nane. Nanu lel saculuh aynuk rooxe tillaabishno nolle tane.

¹⁷ Laakin akkinnanti caalamti iraaro yeellemko, kaa sacal lel gidcat lem macalsiita, ishi qalbe lel yarhuwe, aaginah kinni Yallahi kaxani kayyadde sigo dhiicam?

¹⁸ Cindha cindhaamo, abitto kee rummah kibah afah hido anrabah akxine waynoo.

¹⁹ Taginah lel nanu rummaako kinom naarhago kino, kaa wajhelle lel ninni qalbe nashshamano kino.

²⁰ Amaymih ni qalbi uma firde noh yoxoyemko, Yalli ni qalbeeko naba, ummannim lel yaarhige.

²¹ Yi kaxantoolito, ni qalbi uma firde noh axaye wayemko, Yallih wajhelle fidbe lino.

²² Kaa amre dhawurhnah kee kayya ruf-ishsham abnamhi sabbatah, dhaaciminnanim lel kaako kabbatna.

²³ Tatiya kinni lel kaa amri: usuk amre akah noh yoxoyka balih, kaa Barha kin Yeesus Masiix migacalle naaminem kee sittiya nakxinem.

²⁴ Kaa amre dhawrhinnanti lel kayyadde siga, usuk lel kayyadde; taginah lel usuk noh yoxoye Ufayeh usuk nottadde sigam naarhige.