1 YOHANNIS 2 - Saaho Cusub Cahde

Masiix xato noh esserima tiya kinni

¹ Yi cindha cindhaamo, tayim sinalle aktubem, zambe abe waytaanamko ciloh kinni. Laakin akkinnanti zambe abemko, Abbaalih xato noh essera tiya lino. Usuk lel Xaqqi-wanna kin Yeesus Masiix kinni.

² Usuk isheh lel ni zambit-hi beezza kinni, nim busa makiiki lel umbuka caalamah kinni.

³ Taginah lel kaa amre dhawurhnemko, kayya neerhegem naarhige.

⁴ Tamaa “Kaa eerhegeh ane” yarhxeti, kaa amre lel dhawrhinnexeti, usuk zirable kinni, rummi lel kayyadde miyane.

⁵ Laakin kaa waani dhawrhinnanti, rummah Yallahi kaxani kaa addadde yikmileh yane. Taginah lel kaa addadde nanem naarhige.

⁶ Yeesusudde siga arhxinnanti, usuk isheh Yeesus akah gerhak yineekah gerho kaalle tane.

Cusub amre

⁷ Yi kaxantoolito, sinalle aktubiyuk anem cusub amre maki, laakin erherhko luuk tinin basoohit amre kinni. Amaa basoohit amri lel toobbin waani kinni.

⁸ Wuli gabooko, sin kee kayyadde rumma kin cusub amre sinalle aktubiyuk aniyo. Amayim lel dite tillaabak tane, rumma kin ifi lel meceegeddah ifak yane.

⁹ Ishi sacal nicibuk ifodde yane arhxinnanti, kado fan ditedde kinni yanem.

¹⁰ Ishi sacal akxininnanti, ifodde siga. Kayyadde andafishsham mitane.

¹¹ Ishi sacal nicibti, ditedde yane, ditedde lel gerha. Awlalle aduuk yanem lel miyaarhige, amayim lel dite intit kaa wayshishsheh kinni.

¹² Cindha cindhaamo, sinalle aktubiyuk aniyo, amayim lel sin zambit kaa migac hi xurmah sinah xabbiimeh yane.

¹³ Abbubo, sinalle aktubiyuk aniyo, amayim lel tamaa erherhko yine tiya teerhegiinih kinni. Burguude, sinalle aktubiyuk aniyo, amayim lel tamaa uma tiyaako timlikiinih tanin.

¹⁴ Cindhaamo, sinalle uktube, amayim lel Abba teerhegiinih kinni. Abbubo, sinalle uktube, amayim lel tamaa erherhko yine tiya teerhegiinih kinni. Burguude, sinalle uktube, amayim lel sirii mara kitin. Yallahi waani lel sinadde sigta, amaa uma tiyaako lel timlikiinih tanin.

Caalam makxanina

¹⁵ Caalam hido caalamalle tanem makxanina. Akkinnanti caalam yikxinemko, Abbat kaxani kayyadde miyane.

¹⁶ Amayim lel inkoh caalamalle tane (nabsi sumsumutnan, intit sumsumutnan kee iraaroh litomhi amnonobba) caalamko kibah Abbaako maki.

¹⁷ Caalam ishi sumsumoolih tillaabak tane. Yallahi farhi abati, laakin umman gedda sigo kinni.

Masiix-diddeeko asuuso

¹⁸ Cindhaamo, tati sarroorimat waqhte kinni. Tamaa akah toobbiiniikah lel masiix-didde kinti amiituk yane, kado yakkeedo masiix-didde kin mango mari uguteenih yanin. Tayimko lel sarroorimat waqhte kinam naarhige.

¹⁹ Usun nottaako yewcin, laakin nim kuuk miyiniini. Nim kuuk yiniinih yakkindo, nottaalih sige dhaarhen; tayim laakin inkoh nim makinoonim tamadhdhago ciloh kinni.

²⁰ Atin doorot assakat Quddus kin tiyaako litin, atin lel ummannim taarhigin.

²¹ Rumma sodhdheenimhi sabbatah maki sinalle uktubem, taarhigiinimhi sabbatah kinni. Amayim lel walaa inki zirab rummaako maki.

²² Yeesus, Masiix kinni. Tayim xininnanti lel zirable kinni. Abba kee Barha xinati, tati masiix-didde kinni.

²³ Barhah aaliminnixeti Abbah gantah miyaalime; Barhah aaliminnanti Abbah gantah yaalime.

²⁴ Tamaa erherhko toobbiinim sinadde sigtoo. Tamaa erherhko toobbiinim sinadde sigtemko, atin gantah Barha kee Abbadde sigtoona kitin.

²⁵ Usuk noh saye wacdi lel ta tatiya kinni: umman geedit aniina.

²⁶ Ta sinalle uktubem, too sin doolabo acikkinuk yane marahi zacabah kinni.

²⁷ Atin lel amaa Quddus kin tiyaako kabbatten assakat sinadde siga, walaa inketti sin yaydaraso sin mifarhshiisha. Laakin amaa kaa assakat ummanimhi zacabah sin yaydurusem, rumma kibah zirab maki. Amaa akah sin yuyduruseekah kayyadde siga.

Yallih Cindham

²⁸ Cindha cindhaamo, kado lel kayyadde siga, usuk yambulluwe gedda, fidbe naallo kee kaa mumut hi waqhte kaa nifille xoolashshinnamko kinni.

²⁹ Usuk xaqqi-wanna kinam teerhegiinimko, xaqqe abinnanti kaako yoobokeh yanem taarhigin.