1 YOHANNIS 1 - Saaho Cusub Cahde

Aniinat Waanitta

¹ Tamaa erherhko tine, tamaa noobbe, tamaa ninni intih nuble, tamaa kulux adde nerhxe, tamaa ni gabub dhage Aniinat Waanittah sabbatah sinak arhxuk nane.

² Aniina lel timidhdhigeh kinni, nanu lel tee nuble, lel nashhide. Umman geedit aniina, tamaa Abbaalih tineh, nottah timidhdhigeya lel sinak arhxuk nane.

³ Tamaa nubleh noobbem lel sinak arhxuk nane. Amayim lel inkettiino nottaalih taalloona ciloh kinni. Rummah ni inkettiino Abba kee kaa Barha Yeesus Masiixlih kinni.

⁴ Ni xeden kaamil yakko ciloh tayim sinalle naktube.

Ifoddehi gerhnan

⁵ Amaa kaako noobbe farto lel tatiya kinni, sinah lel warishak nane: Yalli ifo kinni; Kayyadde dite inkinnah mitane.

⁶ Kaalih inkettiino lino nerhxemko, ditedde gerhna hanuk, zirabbinna. Rumma lel abittodde ashishak minane.

⁷ Laakin ifodde gerhnemko, tamaa Usuk isheh ifodde yanem balih, sittaalih inkettiino lino. Yeesus, kaa Barhahi biili lel umman zambeeko ni yaysiffiye.

⁸ “Zambe malino” nerhxemko, ninne doolabna, rummi lel nodde miyane.

⁹ Zambit linomuh neelememko, Usuk umun kee xaqqi-wanna kinni, amayimhi idhdhah ni zambit nolle xaba, umbuka uma abittooko lel ni yaysiffiye.

¹⁰ “Zambe abneh minane” nerhxemko, kayyak zirable abna, kaa waani lel nodde mitane.