1 Timoteyos 5 - Saaho Cusub Cahde

Santo kaniisah

¹ Xiyawti daacayna maskaalafinaaki, kayya abba balih ubul, burguude lel sacul balih aydukumus.

² Naba sayyo inon balih, cindha sayto lel sacoola balih umbuka tsitstsaylih aydukumus.

³ Rummah gubon kin gubon xishmat.

⁴ Akkinnan gubna laakin, cindham hido abuusa teellemko, usun yookomiinih sinni xawaz Yallih mashshih akah gerhaanaakah ten yaybulluynim labcaadoonaa. Tayim Yallih intidde mecem kinamhi sabbatah, sinni dhaltoyyah akah yafdawna kinni.

⁵ Rummaahit gubna inkettäk racteya, Yalladde cag abittah, tibbirhekkeeko bar kee lellecih dhaaco kee salaat abitta.

⁶ Tamaa ishe kixin tiyä laakin, tane hanuk rabte tiyä kinni.

⁷ Cadale hinam yakkoona ciloh, taymih ten eemer.

⁸ Akkinnanti ishelle dhaye marah, fertoh lel ishi xawazah takkem abe wayemko, usuk imaan yithlimeh yane, aamininnixe tiyaako lel uma.

⁹ Akkinnan gubna laxtamko aganalle tekkeh, inki baclih numa kuuk tineh yekkemko tankattaboo.

¹⁰ Ishe mece abittotuh tamidhdhige tiyä, cindham carishshe tiyä, gerha kabbatte tiyä, yinqiddise marahi iba wadishshe tiyä, biyaakite mara baclayishshe tiyä, umbuka mece abittoh lel ishe tillaabishshe tiyä tekkemko, xatan maradde gaxtoo.

¹¹ Tamaa cindha gubon laakin, ten farhi adde uguttah Masiixko mirix ten ishsha gedda, marcishimoona farhaanamhi sabbatah, xatan maraalih ten mihayin.

¹² Tamari tamaa erhedhdhot sinni amaana yithlimiinimhi sabbatah Yallih cadale sinnelle oobishan.

¹³ Tayimhi osah lel, careeko careh aduuk bohsa kinni labcaadaanam; bohsa bisa makiiki lel, waanishoona eedinnixoonim waanishaanah, xamiteenit kee ten farhshiishinnixemidde saya mara gantah yakkin.

¹⁴ Amaydo, cangi akah waatimo caashir wayo ciloh, tamaa cindha gubon marcishimeenih, dhaloona kee sinni xawazhi zan abitaanam farhe dhaarhe.

¹⁵ Gari mece geddaako arax xabeenih Sheethan kataak yanin.

¹⁶ Akkinnan taamine numa teyalle dhaye gubon teellemko, ten baclayishshoo. Tamaa kaniisa rummah gubon kin mara xatto ciloh, usun cuuka alle akke wayoonaa.

¹⁷ Tamaa meceetih yaxkume kaniisat naba marah, fertoh lel warroyishnan kee aydarasah xawala marah, xishma kee casbi akah eeda.

¹⁸ Amayim lel Kutuub: “Beceeri yaskiyyide gedda af akko tarhawo kolle mitane”, amayim lel “Yakhdumeti ishi casbe geyo akah eedda” yarhxemhi sabbatah kinni.

¹⁹ Lamma hido adooxa shaahid alle geytimeenih akke wayemko, kaniisat naba tiyalle yakke kisse mikabbaatin.

²⁰ Tamaa zambe aba mara yekkemko, aki xiyaw mashshiitoona ciloh, umbuka marahi afalle ten oskoolof.

²¹ Barhsa kee gunco abekkah, tayim katattayto Yalla, Masiix kin Yeesus kee doorime malaykutti nifille ku asuusak ane.

²² Akkinnan tiyalle gaba hayaanamah mammaakamin, aki marahi zambedde managali. Ishi tsitstsaye dhawurh.

²³ Ishi garba kee tamaa kodde gaxangaaxa laxuuh arhxituk, dago wayni ucub kibah, kamboh laye bisa maacabin.

²⁴ Xiyawko garih zambi mudhdhug kinam kinni, firde fanah lel nifidde akko aduuk yane, aki marahi zambi laakin sarrah yambulluwe.

²⁵ Amayim balih lel, mece abittot mudhdhug kinni, mudhdhug akkinnixem lel, sucuteh raaco mirhiica.