1 Timoteyos 4 - Saaho Cusub Cahde

Gari imaanko yawcoona kinon

¹ Yamiite waqhtelle, gari sinni imaan xabeenih doolable ufayit kee junuun aydaras katattawna kinoonim, Ufayi cadimbililih arhxuk yane.

² Ta aydaras lel niyaako rabte munaafiqhiin kin zirablitko kinni yamiitem.

³ Usun marca takkemko deesoona kinon, tamaa yaamineh rumma yaarhige mari xamdeelih kabbaatoona Yalli yukhluqhe folooko sinne yabbarhoona, xiyaw yaamaroona kinon.

⁴ Yalli yukhluqhem inkoh mecem kinni, xamdeelih kabbaatimtemko lel, xinnitimtamah walaa inkim adde mitane.

⁵ Amayim lel Yallih waanitta kee salaatah tinqiddisemhi sabbatah kinni.

Masiix kin Yeesus mece khaddaam

⁶ Tayim tamaa saculuh caddossemko, imaan waani yudruse tiya tekkeyaako, tamaa katattayteh tanito mece mazhabah, Masiix kin Yeesus mece khaddaam takko kito.

⁷ Caalamti tinem-tine sayyot daacunhiyaako mirix-erhex. Sarreh Yallih mashshih akah tadiyeekah ishe labcaadish.

⁸ Nabsi karim labcaadishaanam dago makko luuk, Yallih mashshi labcaadaanam, kaadit aniina kee tamaato le aniinahi wacdi gantah adde yanemhi sabbatah umman ginah naba makko leya.

⁹ Ta marhxo rumma kinni, ummanti lel kabbaato alle tane.

¹⁰ Amayimhi idhdhah, umman tiya, fertoh lel yaamine marahi Gargeereena kin yane Yalladde cag linomhi sabbatah, xawalak kee andufulinuk nane.

¹¹ Tayim amreh toxoyeh uydurus.

¹² Ku cindhaaneh walaa inketti ku ilaace wayooki, tamaa yaamine marak waanih, adabeh, kaxanoh, imaanah, tsitstsayeh misaal akko ab.

¹³ Anu amiitem fanah, Kutuub xiyawah yaqhriinim, warroyshaanam kee yaydurusiinimidde hammit.

¹⁴ Tamaa muttuxuwa, nabii waanih araxah kaniisat naba mari gabub kolle hayen gedda koh tomxoyeya mibaddaahishin.

¹⁵ Atu afeededituk tanitom ummanti yablo ciloh, taymidde meceetih ramac adde terhxeh ab.

¹⁶ Ishe kee tamaa taxaye darse macalsit. Taymille lel qath-erhex, tahe abtemko, ishe kee ku yaabbe mara gargerto kito.