1 Timoteyos 3 - Saaho Cusub Cahde

Kaniisat bukalle macalso aba mari yakkoona missilam

¹ “Akkinnanti kaniisat bukalle macalso aba tiya yakko duumutemko, mece abittoh hambereerak yane” tarhxe marhxo rumma kinni.

² Amaydo, tamaa kaniisat bukalle macalso abati cadale-hin tiya, inki numah bacla, himma le tiya, adabe le tiya, xishma le tiya, gerha kixin tiya, yaydaraso dhiica tiya,

³ askirinnixe tiya, angaacinnixe tiya makiiki mece tiya, anzeegexinnixe tiya, solaadi kixin akke waya tiya yakko kaalle tane.

⁴ Ishi xawaz meceetih yasxedeedereh, kaa cindham akah yam-izzizin tiya yakko kaalle tane.

⁵ Ishi xawaz akah yasxedeederiiniikah sorhemko, tamaa Yallih kaniisa aaginah baclaysho kinni?

⁶ Amnonobbah xaffuweyaako ibliis balih firdedde radamko lel cusubih yeemene tiya yakko kaalle mitane.

⁷ Amayimhi osah, xoola kee ibliis machchawaadiyadde radamko ciloh kaniisaako irolle yane maraako mece shahaada le tiya yakko kaalle tane.

Kaniisadde yakhdume mari yakkoona missilam

⁸ Kaniisadde yakhdume mara amayim balih, xishma-le mara, lamma-aflit akkinnixe mara, askirinnixe mara kee kasbi hirfe hin mara yakkoona tenalle tane.

⁹ Tamaa imaan mashthir cado-qalbeh yabbirhe mara yakkoona tenalle tane.

¹⁰ Yookomiinih lel yammarmaroonaa; caddaaliminnixe mara yekkiinih geytimeenimko lel kaniisadde yakhdume mara yekkiinih yakhdamoonaa.

¹¹ Ten sayyo amayim balih xishma-le mara, xamitinnixe mara, hamme-le mara, ummanimih yaaminin mara yakkoona tenalle tane.

¹² Kaniisadde yakhdume maraako ummanti inki numah bacla, sinni cindham kee sinni xawaz lel meceetih yasxedeedere mara yakkoonaa.

¹³ Kaniisadde yakhdume mara yakkiinih meceetih yakhdume mari, sinneh mece cara geyan, Yeesus Masiix araxah yamiite imaanah lel naba fidbe geyoona dhiican.

Yallih mashshih yadiinimhi gelo

¹⁴ Dheh kolle amaato caagak, tayim kolle aktubiyuk ane. Amayim lel,

¹⁵ anu caawitemko, akkinnanti tamaa Yallih caredde, rummi camidda kee masarrat kin yane Yallahi kaniisadde, aaginah xibarah gerho kaalle tanem taarhago ciloh kinni.

¹⁶ Rumma lel Yallih mashshih mashthir naba tiya kinamah nashhide: Xiyawti xazotta yekkeh yumbulluwe, xaqqi-wanna kinam Ufayeh yimidhdhige, malaykutuh yumbulluwe, wathunti fanadde warroye, caalamalle akah yeemenin, nabnedde lel yumuqquce.