1 Timoteyos 1 - Saaho Cusub Cahde

Salaamta

¹ Ni Gargeereena kin Yalla kee Masiix kin Yeesus ni cagah, Masiix kin Yeesus fartotta yakko doorime Bawlosko,

² tamaa imaanah rummah yi barha kin Timoteyos fanah; ni Abba kin Yalla kee ni Maddara kin Masiix kin Yeesusko nicma, raxma kee maaxiyo kottaalih takkoo.

Zirabti mudarrisiinko zeelitaanam

³ Makedooniya adiyuk iniyo gedda akah ku asuuseekah, gari barhsime mazhab yaydurusiinimko ten taamaro ciloh, Efesosulle sug.

⁴ Amayim balih lel tinem-tine kee abayshima hin waalidodde sayanki ten asus. Tayim yerhxin-yerhxin kibah imaanah geytima Yallih xagara balih xiyaa beytam maki.

⁵ Ta amrih bursaale lel, tamaa tsitstsii afcaado, cado-qalbe kee rummaahit imaanko yamiite kaxano kinni.

⁶ Xiyawko gari lel takkeeko yewciinih amficinnixe ankaaxadadde gaxeenih yanin.

⁷ Tamaa arhxuk yaniinim hido fidbeelih adde waanishak yaniinim sinneh miyafhimiini hanuk, sercat mudarrisiin yakkoona farhan.

⁸ Kado, xiyaw araxah yetneefeciinimko, sercat mece tiya kinam naarhige.

⁹ Tayim naarhige, sercat akah yewcem xaqqi-wannun akkekkah, sercat-hinam kee akko yarhxiinim aabbinnixe marah, Yallih mashshi hin mara kee zambi-wannunuh, anqiddisinnixe mara kee diin hin marah, sinni abbub kee sinni inon yaatuke mara, nabsi-wannunuh,

¹⁰ uma-xibarlitih, lawaathah, xiyaw yaabixe marah, zirablitih, zirabadde dhiiwittamah kee inkoh tamaa rummaahit mazhabko irolle xiyaa tayyaacemih kinni.

¹¹ Tayim lel tamaa anu warroysho amaanah yolle yomxoye, baraka-le Yallih nabnet mece wareelih tadiyem kinni.

Masiix kin Yeesus zambi-wannun gargeero yemeete

¹² Kaa akhdamo yi yiysiriyeh yi yeemenemhi sabbatah, ta khidmadde yi doore ni Maddara kin Masiix kin Yeesus cawwatoyshitak aniyo.

¹³ Amayim lel anu basoh Maddarah waatimah, hadanah, duuda kin mucaarid kuuk yine tiya kiyo hanuk kinni. Tayim sorha kee imaan waytoh abemhi sabbatah raxma kabbaateh aniyo.

¹⁴ Masiix kin Yeesusko yamiite imaan kee kaxanoolih, ni Maddarahi nicma yottah mangum yoh temmenge.

¹⁵ “Masiix kin Yeesus zambi-wannun gargeero yemeete” tarhxe marhxo rumma kee meceetih kabbaatimto missilam kinni. Anu lel umman tenko uma-tiya kiyo.

¹⁶ Anu lel tayimhi sababah kinni raxma geyem; Masiix kin Yeesus tamaa naakitto hin ishi sabre, yookomeh umman tiyaako uma yottalle yuybulluweh, umman geedit aniina geyoona kayyah yaamano le marah misaal yok abe.

¹⁷ Tamaa umman geedit nugus, rabinnixe, ambulluwinnixe, inki Yallah, umman gedda kee umman gedih xishma kee nabne takkoo. Amin.

¹⁸ Timoteyos yi barhaw, yookomiinih tamaa ku zacabah aben nabii waanidde cikkishitak, ta amre amaanah kolle axayik aniyo. Tayimhi araxah lel mece dhiba abe lito.

¹⁹ Imaan kee cado-qalbe eellaa. Xiyawko gari lel tayim xinaanah tiggidile cibri tamundhuceya balih sinni imaan yaylayin.

²⁰ Ten addadde lel Yallah waatime wayaanam yaarhagoona ciloh, Sheethanah oxoye, Himenayos kee Aleksaander yanin.