1 Tessaloniike 5 - Saaho Cusub Cahde

Maddari lellec

¹ Kado ni saculo, zaban kee waqhtih zacabah sinalle yaktubiinimih walaa inkim sin mifarhshishsha.

² Amayim lel, tamaa garceeni bar akah yamiiteekah, Maddari lellec lel amaa ginah yamaato kinam, atin meceetih taarhigiinimhi sabbatah kinni.

³ Xiyaw: “Maaxiyo kee amaan kinni” arhxuk, tamaa soonowa kin numa umlaaloh akah tandhibbirheekah, gar-heeko yalawna kinon, akko yassaacoona lel makinooni.

⁴ Ni saculo, atin laakin ditedde mitaniinimhi sabbatah, amaa lellec garceena balih sinadde yamaato maki.

⁵ Atin lel inkoh ifi cindham, lellecti cindham kitin. Nanu barti cindham hido ditet cindham makino.

⁶ Amaydo, garo balih dhiine waynooki, macalsinneh himma-abinnoo.

⁷ Amayim lel dhiina mari bar dhiinan, yaskire mari lel bar yaskiriinimhi sabbatah kinni.

⁸ Nanu laakin lellecti cindham nekkek sarrah, imaan kee kaxani dirce sarinneh, gargerti cag lel birti qoobic balih hashshinneh, himma-abinnoo.

⁹ Yalli, ni Maddara kin Yeesus Masiix araxah garger geyno kibah, kurah ni maaxayinna.

¹⁰ Himma-abinneh hido dhinneh, kaalih aniinadde marno ciloh, Masiix nottah arhxuk rabe.

¹¹ Amaydo, tamaa akah abak taniiniikah, sinne-sinneh sittiya aydukumusseenih lel sittiya carishanta.

Abayshimat fawo kee dhaaco

¹² Ni saculo, tamaa sin addadde xawala mara kee Maddari araxah sin santishah sin asuusa mara kinoonim taarhagoona sin dhaacimak nane.

¹³ Ten ciyyoh lel meceetih mango kaxanoolih ten xishmatanta. Sinne-sinneh lel maaxiyodde maranta.

¹⁴ Ni saculo, tamaa bohosa kin adabe hin mara asuussoona, tamaa niya cide mara aydukumussoona, tamaa rukut mara lel xattoona, umman tenlih lel sabre taalloona sin dhaacimak nane.

¹⁵ Sinko walaa inketti umaani, umaanih yafdiyek selitanta, umman gedda laakin, sinne-sinneh yakko, umman marah mecem abtoona wagiyanta.

¹⁶ Umman gedda xedenanta,

¹⁷ Daweena hinnim dhaaco abanta,

¹⁸ Masiix kin Yeesus araxah tayim sinah Yallih farhi kinamhi sabbatah, umman gondodde xamde eddebbaanta.

¹⁹ Quddus kin Ufaye mibadishina.

²⁰ Nabii balih aban waani miilaacinantaaki,

²¹ ummanim timirmiriinih, tamaa mecem qath-ishanta.

²² Umman caynah umaaniiko sinne ibbirha.

²³ Maaxiyot Yalli isheh sittiyadde sin yaqhaddasoo, sin ufaye, rooxe kee nabsi ni Maddara kin Yeesus Masiix gaxnanah abar hinnim akah sugaakah dhawrhumoo.

²⁴ Usuk tamaa sinah deecimati umun kinni; usuk lel thummutuh amayim abo kinni.

²⁵ Saculo, dhaaco noh abanta.

²⁶ Umbuka sacul lel, tinqiddise fugtoh salaam akko erhexanta.

²⁷ Ta jawaab umbuka saculhi nifille taqhrawna Maddari migacalle amaana sinak arhxuk ane.

²⁸ Ni Maddara kin Yeesus Masiix nicma sinlih takkoo.