1 Tessaloniike 4 - Saaho Cusub Cahde

Yalla xedenishsha aniina

¹ Abayshimalle, haye yi sacul, Yalla akah xedenishshaanaakah, aaginah gedhdhoona sinalle tanem nottaako kabbatteenih tanin. Kado lel amaa ginah abaa tanin. Taginah ziyaada meceetih gedhdhoona ciloh lel Maddara kin Yeesus migacalle sin esserneh sin dhaacimak nane.

² Maddara kin Yeesusko lel aagina-le asxossa sinah noxoyem taarhigin.

³ Yallih farhi lel atin tanqiddisiinim kee uma-xibarko sinni tabbirhiinim kinni.

⁴ Sinko ummanti ishi nabse anqaddas kee xishmadde aaginah dhawrham yaarhagoo.

⁵ Tamaa Yalla sorha Aki-mara balih farhih misumsumutina.

⁶ Ta gondohi sabbatah walaa inketti ishi sacal yeezeyeh adde ambillitse wayo. Amayim lel tamaa nookomeh dhacumaatih akah sin asusneekah, Maddari tayim aba marahi xane yafdiye tiya kinamhi sabbatah kinni.

⁷ Yalli anqaddasah kibah xaraameh noh mideeciminna.

⁸ Amaydo, tayim ilaacinnanti, tamaa Quddus kin ishi Ufaye sinah yaxaye Yalla kibah, xiyawto maki ilaacak yanem.

⁹ Kado, sacoolinni kaxanohi sabbatah, sittiya yakxiniinim atin sinneh Yallaako labcaddeenih taniinimhi sabbatah, amaymih walaa inketti sinalle yaktabo mifarhshishsha.

¹⁰ Rummah lel umbuka Makedooniyalle tane sacul inkoh kixintin. Laakin ko ni saculo, tayim ziyaada meceetih abtoona sin dhaacimak nane.

¹¹ Tamaa nanu akah sinah nesxesseekah lel sukuunudde martoona, sinni maxadadde hammitteenih sinni gabah ushtuqhula.

¹² Amayim lel garodde fadhdhaanamko kee tamaa imaanko irolle yane mari sin xishmatoona ciloh kinni.

Maddari gaxnan

¹³ Laakin yi saculo, tamaa cag hin aki xiyaw balih taxziniinimko, tamaa rabidde dhiineh yane marahi zacabah sodhdhoona sinak mifarha.

¹⁴ Yeesus rabem kee gaxeh rabaako ugutemih neemenek sarrah, amaydo Yalli tamaa rabidde dhiineh yane mara Yeesus araxah ten uguseh, kaalih ten baaho kinni.

¹⁵ Nanu tamaa wafaalih yane marak, Maddari gaxnan fanah lel raaceh yane marak, tamaa rabidde dhiineh yane maraako naakamo makinom, Maddari waanittah sinah warishak nane.

¹⁶ Maddari isheh ishi amri naba andhaxlih, malaykutti naba tiyahi dhawlih, kee Yallih thurumbahi dhawlih carsheeko oobo kinni. Masiixille yeemeneh rabe mari lel yookomiinih ugutoona kinon.

¹⁷ Amaymik sarrah, nanu tamaa wafaalih sugeh, raace marak, cashshaballe kayyah garayno ciloh tenlih nekkeh darurudde nawco kino. Umman gedda lel Maddaraalih nakko kino.

¹⁸ Amaydo, atin ta waanih sittiya aydukumusanta.