1 Tessaloniike 3 - Saaho Cusub Cahde

¹ Amaydo, curno mirhiicinomhi sabbatah, Ateenalle ninni ulah racnam farhneyaako,

² Masiix mece warehi araxah Yallih khidma nottaalih yangale ni sacal, Timoteyos sin imaanalle sin yaysabato kee aydukumuso sinalle farne.

³ Amayim lel sinko walaa inketti ta waaxeltah yanzebeebelemko ciloh kinni. Nottah tayim ni cija kinam atin sinneh taarhigin.

⁴ Nanu sinlih nine gedda, caggaboyno kinom gaxne-gaxneh nookomeh sinah warishneh nine. Akah taarhigiiniikah lel taykinna caggaboyneh nane.

⁵ Tayimhi sabbatah, anu lel tayimko aganalle curo taane gedda, tamaa yacikkineti sin yiscikkineh, ni xawal lel foyya yekkemko, sin imaan aagina kinam ablo farto sinalle abe.

Timoteyosti aydukumusa ware

⁶ Kado laakin, Timoteyos sinko nottalle gaxeh yanemhi sabbatah, sin imaan kee sin kaxanooko xedenisha ware noh baahe. Umman gedda mecaanih ni xunsussaanam kee tamaa nanu sin nablo akah sinah sannaakah, atin gantah ni tabloona noh hamberertaanam noh warishe.

⁷ Tayimhi sabbatah, yi saculo, umbuka ninni qadab kee waaxeltadde, sin imaanah rufto geyneh nane.

⁸ Atin Maddari araxalle tasbitin gedda, nanu cusub aniinah marna.

⁹ Nanu sinah arhxinuk, Yallih nifille xedenne xeden, sin zacabah aagina-le xamde kinni Yallah nadabbo linom?

¹⁰ Nif kee nifih sin nablo kee sinak yunquse imaan sinah naskamalo, bar kee lellecih dhaaco abak nane.

¹¹ Kado, isheh ni Abba kin Yalla kee ni Maddara kin Yeesus sin gabolle ni santishoonaa.

¹² Tamaa nanu sina akah kixinnooka balih, Maddari sinne-sinneh kee aki xiyawlih, kaxano sinah ziyaadisheh sinah yaymangoo.

¹³ Amaa Maddara kin Yeesus umbuka yinqiddise maraalih adde gaxa lellecidde, ni Yalla kee Abbahi nifille, cadale hin yinqiddise mara takkoona ciloh, sin afcaado sinah yaysabatoo.