1 Tessaloniike 2 - Saaho Cusub Cahde

Bawlos khidma Thessaloniikeeti xiyawalle

¹ Yi saculo, nanu sinalle nemeetem, sik-nerhxih makinam, atin gantah taarhigin.

² Laakin nanu mece geddaakoh Filibbille biyaakinnem kee umammaatih ni yibbirhiinih yiniinim akah taarhigiiniikah kinni. Yakko kibah mango gixlodde aninuk, Yalli noh yoxoye fidbeh mece ware sinalle warroyishno dhicneh nane.

³ Amayim lel ni asuuso akke wayneeko, hido uma xisaab, hido sina doolabno ciloh abnem maki.

⁴ Laakin tamaa amaanah nolle yomxoye mece ware, Yalli akah yishhide mara nekkeh waanishak nane. Tayim lel xiyaw xedenishno akkekkah, tamaa ni afcaado yamirmire Yalla xedenishno ciloh kinni.

⁵ Akah taarhigiiniikah, nanu alaaliyot waaniilih, hido hirfi takaleh maamaatino, taymih lel Yalli ni shaahid kinni.

⁶ Sinko yakko aki xiyawko nabne miwagiinnino. Masiix fartottit kinoyaako laakin ninni mas-uuliya sin nayballaw dhiice dhandhe.

⁷ Laakin ishi cindhamhi zan abittah baclayishsha ina balih, sin fanadde xiyaawinna le mara kuuk nine.

⁸ Amayim balih, nanu sinah sannah, mangum lel sin kixininomhi sabbatah, Yallih mece ware bisa akkekkah, ninni aniina gantah sinah naxawo farhneh nine.

⁹ Yi saculo, ni ciyyo kee ni xawal tazzikkirin. Sinko walaa inkettalle cuuka nakkemko ciloh, Yallih mece ware warroyishnak bar kee lellecih nukhdume.

¹⁰ Atin yaamine marak sin fanadde, aaginah quddus, xaqqe kee abar hin araxah sin fanadde marak ninemih, sin kee Yalla shohoda kitin.

¹¹ Akah taarhigiiniikah, abba ishi cindhamlih abam balih,

¹² tamaa ishi nigsinna kee nabnedde sinah deecima Yallah missil araxalle tadawna sinalle tanemih, sinko umman tiya aaginah fayishneh aydukumusnem taarhigin.

¹³ Tamaa nottaako toobbin, Yallih mece ware kabbatten gedda, tamaa yaamine marak sinalle abak yanem, tamaa rumma akah kinniikah, Yallih waani balih kibah, xiyaw waani balih mikabbaatitiinimih, daweena maleh Yalla xamdishinna.

¹⁴ Yi saculo, atin tamaa Masiix kin Yeesusuh taamine Yahuudiyalle tane Yallih kanaayisih timmingidiinih tanin. Usun Yahuudko camaza akah kabbaateeniikah, atin gantah amayim balih, sinni dik hi maraako camaza kabbatteenih tanin.

¹⁵ Yahuud, ni Maddara kin Yeesus kee nobowa yigdifin, notta gantah ni hadanen, Yalli akxininnixem abeenih lel umbuka xiyawhi didde yekkiinih yanin.

¹⁶ Nanu Aki-mari gargeerimoona tenlih waanishnamko ni deeseenih, sinni baso balih, sinni zambih qiyaas amaguk yanin. Laakin Yalli tayek basookah ishi kura alle ulluseh yane.

Bawlos Tessaloniikeeti xiyaw yablo hambereera

¹⁷ Laakin yi saculo, nanu ninni afcaadooko sinlih nine hanuk, urhurh waqhte sinko barhsimneh ninemhi sabbatah, nif kee nifih sin nablo mango hambereero kee farhi lino.

¹⁸ Nanu sinalle namaato farhneh nine; anu, Bawlos, inkinnah inki gedda kee lamma gedda icikkine, laakin Sheethan ni deese.

¹⁹ Ni cag, hido ni xeden, hido kaa gaxnanalle ni Maddara kin Yeesus nifille akah falinna ni bor miya kinni? Sina makini?

²⁰ Amayim lel atin ni nabne kee ni xeden kitiinimhi sabbatah kinni.