1 Tessaloniike 1 - Saaho Cusub Cahde

Salaamta

¹ Bawlos, Silas kee Timoteyosko, Abba kin Yalla kee Maddara kin Yeesus Masiixidde tane Tessaloniikeeti xiyawhi kaniisa fanah. Nicma kee maaxiyo sinlih takkoo.

Tessaloniikeeti xiyawhi imaan kee misaal

² Umman gedda ninni dhaacodde daweena maleh sin xusak, umbuka sinah Yalla xamdishinna.

³ Sin imaanhi ciyyo, tamaa kaxanolle dhishshiime sin xawal, tamaa ni Maddara kin Yeesusudde yane cagadde cikite sin curtayyo, ni Yalla kee Abbahi nifille xunsuusak nane.

⁴ Ko Yallih kaxantoolit kin saculo, usuk sin doorem naarhige.

⁵ Amayim lel tamaa nanu warroyishna mece wari, waanih bisa makiiki sinalle yemeetem; laakin xayla, Quddus kin Ufaye kee rummaahit ashshamanlih gantah kinamhi sabbatah kinni. Nanu lel sinah arhxinuk, sin fanadde aaginah marak ninem taarhigin.

⁶ Atin mango waaxelta kabbatten hanuk, tamaa waanitta Quddus kin Ufayehi xedenlih kabbatteenimhi sabbatah notta kee Maddarah timmingidiinih tanin.

⁷ Amaymih lel Makedooniya kee Akhaayalle yane yeemene marah misaal tekkiinih tanin.

⁸ Sinko tewce Yallih waanitta, Makedooniya kee Akhaayalle bisa maki tomoobbemki, atin Yalladde litin imaan ummanille yomoobbeh yane. Amaymih nanu adde waanishnam mifarhshishsha.

⁹ Atin yane rummaahit Yalla takhdamoona ciloh, aaginah asnaamko Yallalle gaxteenim kee nanu sinlih aninuk geyne kabbat hi zacabah usun sinneh ware noh yoxoynih yanin.

¹⁰ Amayim lel, kaa Barha tamaa usuk rabaako uguseya, tamaa tamiite kuraako ni yayyaace Yeesus carsheeko ilalteenih, kayya takhdamoona abteenim kinni.