1 Korintos 7 - Saaho Cusub Cahde

Waasibot gondo

¹ Tamaa yolle tuktubin gondohi zacabah yekkemko: “Labhatti numaalih dhiine wayam mece.”

² Laakin uma-xibaradde saytaanamko ciloh, labhatti ishi numa, numa lel ishi bacla taalloona sinalle tane.

³ Bacli ishi numah tee xaqqe akah abo, numa lel amayim balih ishi baclah kaa xaqqe akah abto alle tane.

⁴ Numa ishi nabsih wanna maki, tee bacli laakin kinni. Amayim balih, bacli ishi nabsih wanna maki, kaa numa laakin kinni.

⁵ Dhaaco abittoona fadhdhan dago waqhteeko bextih sittiyaako mibarhsimina. Sinni nabse tabbarhoona tantenyaako, Sheethan cakanadde sin sayshak, inkidde malammih engela.

⁶ Tayim arhxem laakin fawoh kibah amreh maki.

⁷ Ummanti yotta balih yakkem farhe dhaarhe. Ummanti laakin ishi-ishi muttuxuwa, wuliti wuli cayna, wuliti lel aki cayna Yallaako geyeya le.

⁸ Marcishitinnixe mara kee gubonuk yotta balih cazzaabok defeyaanam akah tashshe arhxe.

⁹ Sinni nabse yabbarhoona taaneenimko laakin, marcishitoona alle tane. Farhih xararaanamko marcishitaanam tashshe.

¹⁰ Marcishite marah, (yim akkekkah ta Maddari) amre akah axaye: numa ishi baclaako tamfattaxo teelle mitane.

¹¹ Timfittixemko laakin, marcishimekkah marto hido ishi baclaalih wagarto teelle tane. Bacli lel ishi numa yaftaxo kaalle mitane.

¹² Raace marak lel (Maddara makiiki anu) sinak arhxem, akkinnan sacal aamininnixe numa yeellemko, ishi lel kaalih marto fadhdhemko, tee yaftaxo kaalle mitane.

¹³ Akkinnan numa aamininnixe bacla teellemko, usuk lel teelih maro farhemko, ishi kaa taftaxo teelle mitane.

¹⁴ Amayim lel aamininnixe bacli ishi numahi sabbatah quddus yakke, aamininnixe numa lel ishi baclahi sabbatah tinqiddise tiyä takkemhi sabbatah kinni. Akke wayemko sin cindham xaraamim yakkin, kado laakin tinqiddisem kinon.

¹⁵ Aamininnixeti barhsimo farhemko, barhsimoo. Ta gina-le gondodde, sacal yakko sacla ten tarhuwem mitane. Yalli sinah deecimem salaamah martoona kinni.

¹⁶ Te numa, ku sabbatah ku bacli gargeerimo ayim taarhige? Hido ko bacla ishi numa gargertaado ayim taarhige?

Akah sinah deecimeeniikah mara

¹⁷ Ummanti Maddari akah yoxoyeekah kee Yalli kaa deece gedda akah yineekah maroo. Tayim umman kaniisalle yi santo kinni.

¹⁸ Akkinnanti deeco akah tekkemko basolle askok-kalum abeh yineho? Askok-kalum asac-isho farhe wayo. Akkinnanti deeco akah tekke gedda askok-kalum abekkah yineho? Askok-kalum abo farhe wayo.

¹⁹ Askok-kalum abaanam, hido askok-kalum abe wayaanam walaa inkim maki. Laakin Yallih amre dhawrhaanam kinni fadhdhishimtam.

²⁰ Ummanti tamaa deeco akah tekke gedda akah sugeekah defeyo alle tane.

²¹ Deeco koh tekke gedda garuzzo kuuk tine? Amaymidde macalah mirabin. Ishi finja geyto dhictemko, amayim ab.

²² Amaa garuzzo kuuk Maddari akah deecimeti, Maddaraako ishi finja geye tiya kinni. Amayim balih, deeco akah tekke gedda ishi finja luuk sugeti, Masiix garuzzo kinni.

²³ Limoh dhammiime mara kinni kitiinimki, xiyaw garuuza makkina.

²⁴ Amaydo, yi saculo, deeco akah tekke gedda farhe xibarah sugeh, ummanti Yallaalih yakkoo.

Marcishitinnixe tiya kee gubna

²⁵ Dhaggitinnixe saytoh zacabah yekkemko, yaaminin tiya akko Maddari raxma kabbaate tiya kiyoyaako inni mablo axayik aniyonkah, Maddaraako amre maliyo.

²⁶ Ta kado adde nane waqhaaqhac sabbatah, xiyawti kado akah yaneekah sugam mecem kinni.

²⁷ Numaalih caqhde turhuweh tanito? Taftaxo miwagiin. Numa hinnimi tanito? Numa miwagiin.

²⁸ Marcishittemko laakin zambe malito. Dhaggitinnixe barhä marcishimtemko lel zambe male. Ta gina-le mari laakin, nabrat waqhaaqhac looniyaako, tayimko sin raacisho arhxeh kinni.

²⁹ Taymih arhxem kinni yi sacul: yomxoyeh yane waqhti urhurh tiya kinni. Kadok sarrah, tamaa sayyo le mari aalle waya mara balih yakkoonaa;

³⁰ tamaa xazzanowa mari lel xazan hin mara balih yakkoonaa; xedena mari lel, xedene waya mara balih yakkoonaa; tamaa dhaama mari lel nuwaa hin mara balih yakkoonaa;

³¹ ta caalamti nabradde hammite mari, macal adde hin mara balih yakkoonaa. Amayim lel ta caalam tillaabak tanemhi sabbatah kinni.

³² Atin shaqhla hinnim martaanam sinak farha. Marcishitinnixeti Maddarimidde kee Maddara aaginah xedenishamadde yamsheeqhele.

³³ Marcishiteti laakin ishi numa aaginah xedenishamadde kee ta caalamtimidde yamsheeqhele.

³⁴ Amaymih lel lammaa-garbita. Marcishime wayte, hido dhaggitinnixe barhä lel tee nabse kee ufayi quddus akah yakko ciloh Maddarimih kinni tamxeesebem. Marcishimte numa laakin, ishi bacla aaginah xedenishshamadde kee ta caalamtimidde tamsheeqhele.

³⁵ Tayim sinak arhxiyuk anem, meceetih hammitteenih Maddara takhdamoona sin nafaacah erhxek kibah, sinalle ascalasho erhxeh maki.

³⁶ Akkinnanti ishi barhäk abak yanem mecim makinam yublemko, ishi lel gufteh tinniyemko, tayim raacinnixem tekkemko, ishi farhi balih aboo; marcishimto tee xaboo, zambi lel alle miyane.

³⁷ Laakin akkinnanti ishi afcaadodde akah yeemeneh, farhinnanti kaa qasbishekkah ishi yabbarho dhiicemko, ishi afcaadodde barhäk tee yabbarho abayishemko, mecem abak yane.

³⁸ Amaydo, ishi barhä marcishinnanti mecem aba, inkinnah marcaako tee yabbirheti lel amayimko mecem aba.

³⁹ Numa tee bacli yanem fanah tumudhdhuwe tiyä kinni. Tee bacli rabemko laakin, Maddarah yaamine tiya bisa yakkoo kibah, isheh fadhdhe tiyadde marcishimto dhicta.

⁴⁰ Yi mablolle laakin, akah taneekah martemko ziyaada xedeneena takke. Anu gantah Yallih Ufaye liyom kinni akkalem.