1 Korintos 6 - Saaho Cusub Cahde

Yaamine mari sittiyah aban kisse

¹ Sinko wuliti akettoolih zagaxa yaalle gedda, ishi gondo yinqiddise maralle beyam hidhdhah, aaginah kinni yifdibeyaako kaa yafradoona xaqqi-wanna akkinnixe maralle yadiyem?

² Hido yinqiddise mari ta caalam yafradoona kinoonim mitaarhigiini? Caalam yafride mara tekkiinik sarrah, ta cindhaahim tafradoona aaginah tantaana?

³ Nanu malaykut nafrado kinom mitaarhigiini? Ta udduuniyat gondo amayimko mango!

⁴ Ta udduuniyat gondo akah dhiinishshan dhinto teelliinimko, amaa kaniisadde cara hin marak aaginah dayaanu abtaana?

⁵ Tayim sin xoolayishsho arhxem kinni. Saculti fanadde tane zagaxa dhiinisho dhiica kas-leti sinadde miyane?

⁶ Amayim hidhdhah, sacal sacalko aamininnixe maralle yadiyeh yathrice?

⁷ Sinne-sinneeko abtan tharaaco sin sareenat-rada kinni. Amayimko atin caggaboytaanam mitashshe? Hido atin garcitimtaanam mitashshe?

⁸ Laakin atin sinne caggaboyishsheenih sinne teyleleyin, tayim lel sinni saculuk gantah abten.

⁹ Hido xaqqi-wanna akkinnixe mari Yallih nigsinna yawrashoona makinoonim taarhigiini? Midoolabimina! Uma-xabarlit, asnaamah yacbude mara, yazniye mara, luuthi,

¹⁰ garaacen, hirfe-lem, sakraaneen, waatimeenit, barheerha Yallih nigsinna yawrashoona makinooni.

¹¹ Sinko gari lel ta gina le mara kuuk yinin. Laakin atin Maddara kin Yeesus Masiix migacalle, ni Yallahi Ufayeh cakalteenih, yinqiddise mara tekkiinih, xaqqi-wannun tekkiinih tinin.

Uma-xibarko kudanta

¹² “Yottah ummanim masmuux kinni”, ummannim laakin tamficem maki. “Yottah ummanim masmuux kinni”, laakin farhinnanimih angazzawo makiyo.

¹³ “Folo garbah, garba lel foloh tekke tiyä kinni”, Yalli lel inkoh lammik ten yaylawo kinni. Nabsi Maddarah, Maddari lel nabseh kibah, nabsi uma-xibarah maki.

¹⁴ Yalli Maddara rabaako uguse, notta lel ishi xaylah rabaako ni uguso kinni.

¹⁵ Sin nabsi Masiix karim kinam mitaarhigiini? Amaydo, Masiix karim beyeyaako sharmuuthat karim akko abo kiyo? Maale haye!

¹⁶ “Lamma inki xazotta yakkoona kinon” yarhxiinim tunkuttubeh akah taneekah, sharmuuthaalih dhiineti, teelih inki nabse yakkem mitaarhigiini?

¹⁷ Yakko kibah, Maddaraalih yengeleti kaalih inki ufaye yakke.

¹⁸ Uma-xibarko kudanta. Xiyawti abinnan aki zambi inkoh kaa nabseeko irolle kinni, uma-xibar aba xiyawti laakin ishi nabsek kinni zambe abak yanem.

¹⁹ Hido sin nabsi tamaa Yallaako geyteenih sin addadde yane Quddus kin Ufayehi macbad kinam mitaarhigiini? Atin sinni mara makitiini.

²⁰ Amayim lel limoh dhammimteenih kinni. Amaydo, Yalla sinni nabsedde eyneba.