1 Korintos 5 - Saaho Cusub Cahde

Uma-xibar kaniisadde

¹ Uma-xibar sin addadde yanem sinak amabbik tane. Ta gina le uma-xibar inkinnah Aki-marahi addalle gantah miyakke. Fertoh ishi abbahi numaalih dhiinati sinadde yane.

² Atin lel amnanabbuk tanin! Sarreh taxzanoona makini sinalle tanem? Tayim abeti sin addaako yacrhawo.

³ Anu nabseh sinko mirix-erhxeh inniyemih, qalbeh sinlih aniyo; sinlih aniyom balih lel ta ginalem abe tiya mece geddaakoh kaa ifrideh aniyo.

⁴ Atin Maddara kin Yeesus migacalle takattin gedda, anu lel ni Maddara kin Yeesus xaylaalih, qalbeh sinlih aniyok,

⁵ Maddari lellec kaa ufayi gargeerimo ciloh, kaa xazotta talawki ta xiyawto Sheethanah kaa uxuwa.

⁶ Sin falo mimece. Dago ayci cagun kaamilik mulxusam mitaarhigiini?

⁷ Muluxinnixe cusub cagun takkoona ciloh, baarrowe ayco asac-isha. Atin rummah ayco malitiini. Masiix, ni Faasigi leemi yumruxxudeh yane.

⁸ Amaydo, tamaa baarrowe aycoh, hido xisde kee umaanit araxah akkekkah, lilla kee rummah cid abinno.

⁹ Uma-xibar abta xiyawlih tangaloona sinalle mitanem inni jawaabadde sinalle uktubeh ine.

¹⁰ Tayim laakin ta caalamti uma-xibar, hido hirfe-lem kee barheerha, hido asnaamah tacbudemidde kab-marhxina yarhxiinim maki. Akke wayemko, ta caalamko irolle tawcoona sinalle tine macna kinni.

¹¹ Anu sinalle aktubiyuk anem, tamaa “Yaamine tiya kiyo” yarhxe uma-xibar le, hido huruf, hido asnaamah yacbude tiya, hido waatimeena, hido sakraan, hido barheerhatto kin tiyaalih tangaliinimko ciloh kinni. Tenlih gantah bettaanamko kinni.

¹² Anu kaniisaako irolle yane mara afrado, ayim adde yok telee? Atin tamaa addadde yane mara makini tafradoona sinalle tanem?

¹³ Tamaa irolle yane mara tafridem Yalla kinni. “Uma xiyawto sinni fantaako hadana.”