1 Korintos 4 - Saaho Cusub Cahde

Fartottitti khidma

¹ Amaydo, xiyaw notta, Masiix yakhdume mara kee Yallih mashthir kinam yasxedeedere mara balih ni yabloona alle tane.

² Tayimhi osah lel, yasxedeedere mari yaaminin mara yekkiinih sugoona alle tane.

³ Anu laakin sin araxah hido aki xiyawhi maxkamah amfirridem yottalle dagum kinni. Rummah, anu inne gantah mafride.

⁴ Anu innedde aarhigemih walaa inkim mitane, taymih laakin barii kiyo macna maki. Yotta yafrideti Maddara kinni.

⁵ Amaydo, waqhti gufekkah walaa inketta mafradina. Maddari yamiitem fanah ilala. Ditedde sucuttem ifolle yeyyeeceyaako, afcaadot macal lel caddoysho kinni. Amaa gedda, ummanti ishi-ishi fayla Yallaako geyo kinni.

⁶ Yi saculo, wuli tiyalle mifalitina, wuli tiya kab-ishsheenih, wuli tiya mirix-miishina. Tamaa: “Tunkuttubeh tanemko foorolle maadayna” akah yarhxeekah, nottaako tadrasoona sin nafaacah erhxeh, inne kee Abolloos misaalah kab sinah isheh aniyo.

⁷ Atu aki maraako akah tashshemih ayim lito? Atu kabbaate waytemih ayim lito? Kabbatteh tinniyemko, kabbaatinnixe tiya balih aymih kinni falittam?

⁸ Mece geddaakoh fadhdhaanam inkoh litin! Mece geddaakoh gaddaalitteenih tanin! Notta hinnim nuguusa tekkiinih tanin! Nanu sinlih nangaso ciloh tingisiinih takkindo amce dhadhdhe!

⁹ Anu laakin Yalli tamaa rabih yimfirride mara balih, nottak fartottittik umman tiyahi sarradde ni hayem kinni akkalem; amayimih lel caalam, malaykut kee xiyaw alle ni tablekkelle ni hayeh yane.

¹⁰ Nanu Masiixih arhxinuk duudit kino, atin laakin Masiixidde kas-le mara kitin. Nanu rukut mara kino, atin laakin xayla-le mara kitin. Atin xishma-le mara kitin, nanu laakin xishma hin mara kino.

¹¹ Ta saaca fanah safriitak, kee bakhaarak, carrazak kee amuttukik nane, dhintima lel malino.

¹² Ninni gabubuh akhdumuk lel mangum taanak nane. Wattimna gedda, dhaaco akah abna, haddaanimna gedda, cursuusutna,

¹³ ni yashshaame maralle mece waanih alle nadabbe. Kado fanah lel ta caalamti cuduf kee ummanti xina mara nekkeh nane.

¹⁴ Tayim sinalle aktubiyuk anem, kixiniyo inni cindham balih sin asuuso kibah, sin xoolaysho maki.

¹⁵ Masiix araxalle sin santishshamko tamana shiix takkem teelliinimih, mango abbub malitiini. Amaymih, Masiix kin Yeesus mece warehi araxah anu sin abba ekkeh aniyo.

¹⁶ Amaydo, sin dhaacimak aniyo: atin yi misaal kataa mara tika.

¹⁷ Taymih kinni lel Timoteyos sinalle farem. Usuk Maddari araxah kixiniyoh umun kin yi barha kinni. Masiixko kin yi aniinah arux umman kanaayisille ayduruseya lel aagina kinam sin xunsuuso kinni.

¹⁸ Gari lel anu sin fanah amaato maliyom yekkeliinih, amnanabbuk yanin.

¹⁹ Anu laakin, Yallih farhi tekkemko, dheh sinalle emeeteyaako, tamaa yamnanabbe mari waanishaanam akkekkah, ten xayla ablo kiyo.

²⁰ Amayim lel Yallih nigsinna xaylah kibah waanih makinamhi sabbatah kinni.

²¹ Ayim fadhdhaana? Iloolih sinalle amiitemi, woole kaxano kee anoonot ufayelihi?