1 Korintos 3 - Saaho Cusub Cahde

Barhsa kaniisadde

¹ Yi saculo, anu laakin xazottat mara kee Masiixidde kaddih zabul kin mara balih kibah, Ufayi adde yane mara balih sinlih waanisho mirhiiciyo.

² Kafin folo bettaanam gufteenih mitaniinimhi sabbatah, xan sin qaqcuse. Kado gantah tinqirribiinih mitaniini.

³ Amayim lel atin kaddih xazottat mara kitiinimhi sabbatah kinni. Sin fanadde ashshiino kee gica tanem, xazottat mara tekkiinih, udduuniyaatim abten gedda makini?

⁴ Sinko wuliti: “Anu Bawlos kataa”, wuliti lel: “Anu Abolloos kataa” yarhxe gedda, udduuniyat mara tekkiinih bisa makini?

⁵ Hido Abolloos aymotta kinni? Bawlos aymotta kinni? Ten araxah akko teemenin khaddamte kinon. Yalli akaa akah ten dhirhiyeekah lel yakhdumin.

⁶ Anu itkile, Abolloos yeefece, Yalli laakin carishe.

⁷ Tamaa carisha Yalla kibah, amaa yatkile tiya yakko, yaaficeti walaa inkim maki.

⁸ Tamaa yatkile tiya kee yaafice tiya lem kinon, ummanti ishi-ishi xawal balih ishi casbe geyo kinni.

⁹ Nanu Yallaalih khidma yangale mara kino. Atin Yallih dhage, Yallih camaara kitin.

¹⁰ Anu Yalli yoh yoxoye nicmah dhiiceena kin naddaaq balih dhishe masarratalle aketti ginak yane. Akkinnanti lel aaginah alle ginam selito kaalle tane.

¹¹ Amayim lel, tamaa dhishshiimeh yane masarratko bextih, akim dhisho dhiicati miyane. Amaati lel Yeesus Masiix kinni.

¹² Akkinnanti ta masarrat hi bukalle dahab, fidda, limo-le dhayit, boxo, cashsho, xasar ginati yinniyemko,

¹³ amaa lellec isheh yayballaw kinamhi sabbatah, umman tiyahi ciyyo tamadhdhago kinni. Amayim lel amaa ciyyo girah tamadhdhago kinamhi sabbatah ummanti ciyyooko ayim abem, amaa gira isheh tacakkano kinni.

¹⁴ Akkinnanti masarrat bukalle gina ciyyo akah tisbitemko, usuk ishi casbe kabbaato kinni.

¹⁵ Akkinnan tiyaako ciyyo akko xarartemko, yakhsaro kinni. Usuk isheh gargeerimo kinni, laakin tamaa girat araxah bisa kinni gargeerimam.

¹⁶ Atin Yallih macbad kitiinim kee Yallih Ufayi sinadde sigam mitaarhigiini?

¹⁷ Akkinnanti Yallih macbad yeyleemko, Yalli kaa yaylawo kinni. Yallih macbad quddus kinni, atin lel ta maqhdas care kitin.

¹⁸ Walaa inketti ishe doolabe wayo. Sinko akkinnanti kadit waqhtedde kas-le tiya ishe yekkelemko, kas-le tiya yakko ciloh duuda yakkoo.

¹⁹ Amayim lel ta caalamti kas Yallih nifille duudiino kinamhi sabbatah kinni. Amaymih lel: “Kas-le mara ten siixoh ten yabbirhe” yarhxiinim,

²⁰ kee malammih: “Kas-le marahi xisaab foyya kinam Maddari yaarhige” yarhxiinim tunkuttubeh tane.

²¹ Walaa inketti xiyawalle falite wayoo. Amayim lel, ummannim sinim kinni,

²² Bawlos hido Abolloos, hido Keefa, hido caalam, hido aniina, hido rabi, hido yane waqhte, hido yamaato le waqhte, inkoh sinim kinni,

²³ atin lel Masiix mara kitin, Masiix lel Yallih tiya kinni.